|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 278 Hüküm no: 296 Orijinal metin no: [42b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Afife bt. Yakub ile boşandığı kocası Mehmed b. Abdullah’ın evlilik borçlarında sulh olması
Havâss-ı Aliyye kazâsına tâbi‘ Cebeci nâm karye sâkinelerinden Afîfe bt. Yakub nâm hâtun meclis-i şer‘-i şerîfde zevc-i mutallıkı işbu râfi‘ü’l-kitâb Mehmed b. Abdullah nâm kimesne mahzarında bi tav‘ihâ ikrâr-ı tâm ve takrîr-i kelâm edip mezbûr Mehmed zevcim olup beni tatlîk etmekle zimmetinde mütekarrir ve ma‘kūdun-aleyh olan bin altı yüz akçe mehr-i müeccel ile nafaka-i iddet-i mu‘ayyenem ve me’ûnet-i süknâm mukābelesinde dahi altı yüz akçe ki cem‘an iki bin iki yüz akçe hakkımı mezbûr Mehmed’den hâlâ taleb [ve] da‘vâ eylediğimde beynimizde muslihûn-ı müslimûn tavassut edip meblağ-ı mastûr da‘vâsından merkūm Mehmed ile beni üç yüz altmış akçe üzerine inşâ-i akd-i sulh eylelediklerinde ben dahi sulh-ı mezbûru kabûl ve bedel-i sulh olan meblağ-ı mezkûru mezbûr Mehmed yedinden tamâmen ahz ve kabz edip meblağ-ı mezbûra müte‘allika âmme-i de‘âvî ve mütâlebâtdan mezbûr Mehmed’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sâlis mine’l-Muharremi’l-harâm li sene ihdâ tis‘în ve elf.
Şuhûdü’l-hâl: Cafer Beşe b. Abdullah, Mehmed b. Mahmud, Hasan b. Abdullah, Mehmed b. Eyüb, Ali b. Mehmed ve gayruhüm.
|