|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 278 Hüküm no: 297 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Çavuş b. Abdullah’ın evini Hasan Bey b. Mustafa’ya satması
Husûs-ı âti’l-beyânın mahallinde ketb ve tahrîri iltimâs olunmağın savb-ı şer‘-i hatîrden mevlânâ Mehmed Efendi b. Nasuh irsâl olunup ol dahi medîne-i Hazret-i Ebâ Eyyûb-i Ensârî’de Câmi‘-i Kebîr mahallesinde sâkin Mehmed Çavuş b. Abdullah’ın menziline varıp zeyl-i kitâbda muharrerü’l-esâmî müslimîn huzûrunda akd-i meclis-i şer‘-i mübîn eyledikde mezbûr Mehmed Çavuş meclis-i ma‘kūd-ı mezkûrda işbu râfi‘ü’l-kitâb Hasan Bey b. Mustafa nâm kimesne mahzarında tav‘an ikrâr ve takrîr-i kelâm edip medîne-i mezbûre tevâbi‘inden kasaba-i Hasköy’de el-Hâc Şaban mahallesinde vâki‘ bir tarafı Âişe Hanım mülkü ve bir tarafı Kazmacılara meşrûta vakıf menzil ve bir tarafı kazzâz Mehmed mülkü ve bir tarafı tarîk-i âm ile mahdûd kapı kurbunda bir fevkānî harâb oda ve altında bir oda ve muttasıl bir fevkānî oda ve selâmlık ta‘bîr olunur bir oda ve muttasıl iki fevkānî harâb oda ve bir fevkānî matbah ve altında ahırı ve bahçeye muttasıl kazzâz Mehmed tarafında üç tahtânî harâb odalar ve bir bi’r-i mâ ve kenîf ve arsa-i hâliye ve bahçeyi müştemil menzil beş sehim i‘tibâr olunup sihâm-ı merkūmeden iki sehmibenim mülk-i müşterâm ve üç sehmirehinden tahlîs için velâyeten kendi malımdan bi tarîki’r-rücû‘ yüz esedî guruş verip sâlifü’z-zikr üç sehmidahi oğlum mezbûr Osman’dan ba‘de’l-bülûğ iştirâ edip mecmû‘-ı menzil mülk-i müşterâm olmuşidi hâlâ ben dahi menzil-i mezkûru cemî‘ tevâbi‘ ve levâhıkıyla mezbûr Hasan Bey’e yirmi beş bin fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr yirmi beş bin akçeyi mezbûr Hasan Bey yedinden tamâmen ahz ve kabz eyledim ba‘de’l-yevm menzil-i mezkûr merkūm Hasan Bey’in mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde tahrîr ba‘dehû ma‘an irsâl olunan Hasan Beşe b. Hüseyin ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ kayd şüd. Fi’l-yevmi’l-hâdî ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Süleyman Çelebi b. Ali, Hasan Beşe b. Hüseyin, Mehmed Çelebi b. ( ), Hasan b. Abdullah ve gayruhüm mine’l-[hâzırîn].
|