|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 279 Hüküm no: 298 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Çelebi b. Ömer’in, Abdi Çavuş b. Rüstem’e olan borcunu ödemesi
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- de Câmi‘-i Kebîr mahallesinde sâkin olup merhûm Abdüsselâm vakfı’ndan yevmî altı akçe du‘âgû vazîfesine mutasarrıf olan bâ‘isü’l-kitâb Abdi Çavuş b. Rüstem meclis-i şer‘-i şerîfde Mehmed Çelebi b. Ömer mahzarında üzerine da‘vâ ve takrîr-i kelâm edip cânib-i vakıfda iki bin yüz altmış akçe vazîfem olup mezbûr Mehmed Çelebi’nin dahi cânib-i vakfa altmış bin akçe deyni olmağla vakf-ı mezbûrun mütevellîsi gāib ani’l-meclis Osman Ağa ile üçümüz bir meclisde iken mezbûr Osman Ağa meblağ-ı mezbûr iki bin yüz altmış akçeyi mezbûr Mehmed Çelebi’den bana havâle-i sahîha-i şer‘iyye ile havâle edip ben dahi havâle-i merkūmeyi kabûl ve meblağ-ı mezbûrdan bin yüz elli akçesini merkūm Mehmed Çelebi yedinden ahz ve kabz edip bâkī bin on akçem kalmağla hâlâ taleb ederim suâl olunup alıverilmesi murâdımdır dedikde gıbbe’s-suâl mezbûr Mehmed Çelebi cevâbında mütevellî-i merkūm Osman Ağa benden ancak bin yüz elli akçe havâle eyledi ziyâde etmedi deyicek müdde‘î-i mezbûr Abdi Çavuş’dan ziyâdeyi mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mütevellî-i mezbûr Osman Ağa mezbûr Mehmed Çelebi’ye meblağ-ı mezbûr bin yüz elli akçeden ziyâde havâle etmediğine yemîn teklîf olundukda ol dahi yemînden nükûl etmeğin mûcebince meblağ-ı bâkī bin on akçeyi müdde‘î-i mezbûra edâ ve teslîme mezbûr Mehmed Çelebi’ye tenbîh birle mâ vaka‘a bi’t-taleb kayd şüd. Fi’l-yevmi’l-hâdî ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Mehmed Çelebi b. Eyüb, Mehmed b. Mahmud, Ali b. Abdullah, Hüseyin b. Ali, Hasan b. Abdullah.
|