Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 360 Hüküm no: 411 Orijinal metin no: [57a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yahya Efendi’nin Kara Hoca’ya olan borcunu, Mehmed Efendi b. Nurullah’ın ödeyip Yahya Efendi’den alacağını tahsil ettiği Hâlâ Tersâne-i âmirede mu‘temed olan İsmail Çelebi b. Hasan nâm kimesne meclis-i şer‘-i hatîrde zikr olunan tersânede baş kâtib olan umdetü erbâbi’t-tahrîr ve’l-kalem Yahya Efendi tarafından husûs-ı âti’l-beyânı tasdîka vekîl olup bimâ hüve nehcü’s-sübût şer‘an vekâleti sâbite olan Mehmed Efendi b. Nurullah mahzarında tav‘an ikrâr ve takrîr-i kelâm edip merkūm Yahya Efendi’nin gāib ani’l-meclis Kara Hoca nâm kimesneye beynlerinde ma‘lûm kereste semeninden ba‘de külli hesâb otuz bin akçe deyni olup merkūm Yahya Efendi deyni olan meblağ-ı mezkûr otuz bin akçeyi merkūm Kara Hoca’ya malından edâ ile ba‘dehû ben sana edâ edeyim deyû bana emr etmekle ben dahi emrine binâen meblağ-ı mezbûru merkūm Kara Hoca’ya malımdan tamâmen edâ ve teslîm etmişidim hâlâ meblağ-ı mezbûr otuz bin akçe ile mukaddemâ her biri dörder yüz ellişer akçeye olmak üzre merkūm Yahya Efendi’ye bey‘ ve teslîm eylediğim yirmi dört aded hâne direği semeninden dahi zimmetinde hakkım olan on bin sekiz akçe cem‘an kırk bin sekiz yüz otuz akçemi merkūm Yahya Efendi’den taleb ve da‘vâ eylediğimde, ol dahi ikrâr ve lâkin edâdan imtinâ‘ etmekle beynimizde münâza‘ât-ı kesîre ve muhâsamât-ı ekîde vakı‘a olmuşidi el-hâletü hâzihî muslihûn tavassut edip meblağ-ı mersûm kırk bin sekiz yüz akçe da‘vâsından merkūm Yahya Efendi ile beynimizde yüz elli kıt‘a esedî guruş üzerine sulh eylediklerinde, ben dahi sulh-i mezbûru kabûl ve bedel-i sulh olan meblağ-ı mezkûr yüz elli esedî guruşu mezbûr Yahya Efendi yedinden tamâmen ahz u kabz edip husûs-ı mezbûra müte‘allika cemî‘ de‘âvî ve mütâlebât ve eymân [ve] muhâsamâtdan merkūm Yahya Efendi’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim ba‘de’l-yevm mazmûn-ı kitâba mugāyir da‘vâ dahi edersem lede’l-hükkâmi’l-kirâm mesmû‘a olmasın dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Umdetü’l-emâcid ve’l-ekârim Hasan Ağa Cizyedâr-ı Ermeniyân, mefharü’l-a‘yân Şevki Mehmed Efendi, Abdi Ağa b. Mustafa, İbrahim Ağa b. Kurd, Kurd b. Mehmed Çelebi, Hüseyin Çelebi b. Mustafa.