|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 280 Hüküm no: 299 Orijinal metin no: [43a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hristo v. Nikola’nın, vakfa ait olup kiraladığı mumhânenin yarı hissesini İstamola v. Panav’a devretmesi
Mahmiye-i İstanbul hısnı ebvâbından Eğrikapı hâricinde sâkin Hristo v. Nikola nâm zimmî meclis-i şer‘-i şerîfde işbu râfi‘ü’r-rakīm İstamola v. Panav nâm zimmî muvâcehesinde tav‘an ikrâr-ı tâm ve takrîr-i kelâm edip merhûm eş-Şeyh Hüseyin Efendi evkāfı’ndan tefvîz-i âti’z-zikrin sudûruna değin icâre-i mu‘accele-i ma‘lûme ve yevmî üç buçuk akçe ücret-i müeccele ile taht-ı tasarrufumda olup medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- [mahallâtından] el-Hâc Hüsrev mahallesinde vâki‘ bir tarafı Hasan mülkü ve bir tarafı vakf-ı mezbûrdan olan selhâne ta‘bîr olunur dükkân ve bir tarafı mekābir-i müslimîn ve bir tarafı tarîk-i âm ile mahdûd birbiri yanında üç bâb fevkānî oda ve önünde sofa ve zikr olunan selhâne üzerinde vâki‘ bir bâb fevkānî odanın tahtânîsi selhânede bu vech üzre cem‘an dört bâb fevkānî odayı ve tahtânî bir mumhâne ve bir mahzen ve bi’r-i mâ ve kenîfi müştemil olup içinde bir kebîr kazgan ve bir köhne mengene ve bir tencere ve üç demir kepçesiyle ma‘an vakf olan şem‘hânenin nısf-ı şâyi‘ini nısf gediğiyle ma‘an mezbûr İstamola’[ya] kırk bin akçe bedel mukābelesinde ma‘rifet-i mütevellî ile tefvîz ve ferâğ edip ol dahi ber vech-i muharrer tefevvuz ve kabûl eyledikden sonra bu ferâğ olan meblağ-ı mezbûr kırk bin akçeyi mersûm İstamola yedinden tamâmen ahz ve kabz eyledim ba‘de’l-yevm sâlifü’z-zikr şem‘hânede ve nısf gedikde vechen mine’l-vücûh alâkam yokdur merkūm İstamola’nın dâhil-i taht-ı tasarrufu olmuşdur emsâli gibi mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’s-sânî mine’l-Muharremi’l-harâm li sene ihdâ tis‘în ve elf.
Şuhûdü’l-hâl: Mustafa Efendi b. Hüseyin el-İmâm, Hüseyin b. ( ) el-Müezzin, Abdullah Çelebi b. ( ), Mehmed b. Mahmud, Hasan b. Abdullah.
|