|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 280 Hüküm no: 300 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Panorya bt. Kiryazi’nin mülk evini Yorgi v. Yani’ye satması
Havâss-ı Aliyye kazâsı nevâhîsinden kasaba-i Silivri’de Metrepolid mahallesi sâkinelerinden olup hâlâ mahmiye-i Galata’da Sultan Bayezid mahallesinde sâkine olan Panorya bt. Kiryazi nâm nasrâniyyenin zevci ve tarafından husûs-ı âti’l-beyâna vekîli olup hasm-ı câhid-i şer‘î muvâcehesinde mezbûrenin zâtını ma‘rifet-i şer‘iyye ile ârifân olan İstemad v. Dimitri ve İsteryo v. Yani nâm zimmîler şehâdetleriyle şer‘an vekâleti sâbite olan Hristodor v. Yorgi nâm zimmî meclis-i şer‘-i hatîr-i lâzımü’t-tevkīrde işbu râfi‘ü’r-rakīm Yorgi v. Yani nâm zimmî muvâcehesinde ikrâr-ı tâm ve takrîr-i kelâm edip müvekkilem mezbûre Panorya karye-i mezbûrede vâki‘ bir tarafı yine benim mülküm ve üç tarafı tarîk-i âm ile mahdûd iki bâb fevkānî oda ve bir ahır ve eşcâr-ı müsmire ve gayr-ı müsmireyi müştemil mülk menzilimi cemî‘ tevâbi‘iyle mersûm Yorgi’ye iki bin akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve kabûl eyleyip semeni olan meblağ-ı mezbûr iki bin akçeyi mersûm Yorgi yedinden tamâmen ahz ve kabz eyledim ba‘de’l-yevm zikr olunan menzilde alâkam yokdur, mersûm Yorgi’nin mülk-i müşterâsı olmuşdur keyfe mâ yeşâ’ mutasarrıf olsun dedi dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-hâmis mine’l-Muharremi’l-harâm li sene ihdâ ve tis‘în ve elf.
Şuhûdü’l-hâl: Abdülbâkī Efendi b. Ahmed, Hüseyin Ağa b. Muharrem, Mehmed Çavuş b. Abdullah, Mehmed b. Mahmud ve gayruhüm mine’l-hâzırîn.
|