|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 281 Hüküm no: 301 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Veli’nin menzilini aldığı borca karşılık istiğlâl yoluyla mütevelli Ahmed Çelebi b. Mustafa’ya satması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesinde sâkin Mehmed b. Veli nâm kimesne meclis-i şer‘-i hatîr-i lâzımü’t-tevkīrde medîne-i mezbûrede merhûme Nâzperver vakfı’na berât-ı âlîşân ile bi’l-fi‘l mütevellî olan işbu râfi‘ü’l-kitâb Ahmed Çelebi b. Mustafa nâm kimesne mahzarında tav‘an ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Dilsiz Hâtun vakfı ve bir tarafı Halil Çelebi mutasarrıf olduğu vakıf menzil ve bir tarafı Davud Ağa mülkü ve bir tarafı tarîk-i hâs ile mahdûd mülk menzilimi cemî‘ tevâbi‘ ve levâhıkıyla mütevellî-i mezbûr Ahmed Çelebi’ye otuz kıt‘a esedî guruşa bi tarîki’l-istiğlâl bey‘ ve teslîm edip ol dahi vakf-ı mezkûr malıyla tarîk-i mezbûr üzre iştirâ ve kabûl eyleyip semeni olan meblağ-ı mezkûr otuz guruşu mütevellî-i mezbûr yedinden tamâmen ahz ve kabz eylediğimden sonra yine mütevellî-i mezbûr menzil-i mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î sene-i âtiye Muharremü’l-harâmı’nın gurresinden sene tamâmına değin dört buçuk guruş ücret ile bana îcâr ve teslîm ben dahi vech-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ vaka‘a bi’t-taleb kayd şüd. Fi’l-yevmi’l-hâmis aşer min Zilhicceti’ş-şerîfe li sene tis‘în ve elf.
Şuhûdü’l-hâl: Mustafa Çelebi Abacızâde, Bektaş Bey b. ( ), altıncı Ali b. ( ), Berber Veli b. ( ), Mehmed b. Eyüb.
|