|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 281 Hüküm no: 302 Orijinal metin no: [43b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Dimo v. Poloyo’nun tarlasını Petko v. Yuvan’a satması
Vilâyet-i Rumeli’nde Kostorova kazâsına tâbi‘ Gramadik nâm karye ahâlîsinden iken bundan akdem mürd olan Poloyo v. Dimo nâm hâlikin sulbî kebîr oğlu Dimo nâm zimmî meclis-i şer‘-i hatîr-i lâzımü’t-tevkīrde işbu râfi‘ü’r-rakīm Petko v. Yuvan nâm zimmî <> muvâcehesinde tav‘an ikrâr-ı tâm ve takrîr-i kelâm edip babam hâlik-i merkūm Poloyo’dan intikāl-i âdî ile bana intikāl eyleyip karye-i mezbûre sınırı dâhilinde vâki‘ lede’l-ahâlî ve’l-cîrân ma‘lûmü’l-hudûd ve’l-mevâzi‘ tahmînen otuz beş keyl tohum istî‘âb eder on beş kıt‘a tarlalarımın hakk-ı tasarruflarını ma‘rifet-i sâhib-i arz ile merkūm Petko’ya dört bin iki yüz fıddî râyic fi’l-vakt akçe bedel mukābelesinde tefvîz ve ferâğ edip ol dahi ber vech-i muharrer tefevvuz ve kabûl eyleyip bedel-i ferâğ olan meblağ-ı mezkûr dört bin iki yüz akçeyi mersûm Petko yedinden tamâmen ahz ve kabz eylediğimden sonra sâlifü’l-beyân tarlamızı mahallinde zabt ve tasarrufa mesfûr Petko’yu taslît eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sâbi‘ mine’l-Muharremi’l-harâm li sene ihdâ ve tis‘în ve elf.
Şuhûdü’l-hâl: Ali b. Koç Bey, Mustafa b. Mehmed, Mehmed b. Mustafa, Mustafa Beşe b. Koçi Bey ve gayruhüm.
|