|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 283 Hüküm no: 304 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Kaftani Ali Ağa’nın vârislerinin miras tarlalarını Mollazade Mehmed Ağa’ya devretmesi
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Kasımpaşa mahallesi sâkinlerinden iken bundan akdem fevt olan Kaftânî Ali Ağa’nın verâseti zevce-i metrûkesi Hatice bt. Abdullah ile sulbî kebîr oğlu Ahmed Ağa’ya ve sulbiye kebîre kızı Emine’ye münhasıra olduğu şer‘an zâhir ve mütehakkik oldukdan sonra sin ve cüssesinin bülûğa tahammülü olduğu hâlde bülûğuna mu‘terif olan mezbûr Ahmed Ağa asâleten ve merkūmetân Hatice ve Emine taraflarından husûs-ı âti’l-beyâna vekîl olup hasm-ı câhid-i şer‘î mahzarında mezbûretânın zâtlarını ma‘rifet-i şer‘iyye ile ârifân olan Mehmed Efendi b. Davud ve Mustafa Ağa b. Abdurrahman şehâdetleriyle şer‘an vekâleti sâbite olan mezbûre Emine’nin zevci Süleyman Ağa b. Halil vekâleten meclis-i şer‘-i şerîfde işbu râfi‘ü’l-kitâb Mollazâde Mehmed Ağa b. Ahmed mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip vilâyet-i Rumeli’nde livâ-i Ağrıboz’da Talende kazâsı müzâfâtından mîrî Tahtalı mukāta‘ası kurâsından Lonkoz nâm karye sınırı dâhilinde mevâzi‘-i müteferrikada vâki‘ lede’l-ahâlî ma‘lûmü’l-hudûd ve’l-mevâki‘ dört bâb çiftçi odaları ve dört bâb mülk-i mevrûs samanlığı ve yetmiş iki keyl-i İstanbulî buğday ve on iki keyl şa‘îr ve ma‘lûmü’l-hudûd bir kıt‘a bağ ile bir kıt‘a bahçenin nısf şâyi‘lerini ve merhûm vezîriâzam sâbık Kara Mustafa Paşa evkāfı kurâsından Livanat nâm karye sınırı dâhilinde mevâzi‘-i adîdede vâki‘ ma‘lûmü’l-hudûd ve’l-mevâki‘ üç bâb mülk-i mevrûs çiftçi odalarıyla üç bâb samanlığı ve doksan keyl-i İstanbulî buğdayı ve on sekiz keyl şa‘îri mezbûr Mehmed Ağa’ya bi safkatin vâhidetin otuz dokuz bin altı yüz akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi ber vech-i muharrer iştirâ ve kabûl eyleyip semeni olan meblağ-ı mezbûr otuz dokuz bin altı yüz akçeyi mezbûr Mehmed Ağa yedinden asâlet ve vekâletimiz hasebiyle ahz ve kabz eylediğimizden sonra emlâk-i merkūmeyi mahallinde zabt ve tasarrufa mezbûr Mehmed Ağa’yı taslît eyledik dediklerinden sonra mezbûr Ahmed Ağa asâleten i‘âde-i kelâm edip zikr olunan Lonkoz karyesi sınırı dâhilinde ma‘lûmü’l-hudûd ve’l-mevâki‘ dört çifte kifâyet eder tarlalar ile karye-i Livanat sınırı dâhilinde vâki‘ ma‘lûmü’l-hudûd ve’l-mevâki‘ üç çifte kifâyet eder tarlalarımın hakk-ı tasarruflarını ma‘rifet-i sâhib-i arz ile mezbûr Mehmed Ağa’ya seksen bin dört yüz akçe bedel mukābelesinde tefvîz ve ferâğ edip ol dahi ber vech-i muharrer tefevvuz ve kabûl eyleyip bedel-i ferâğ olan meblağ-ı mezkûr seksen bin dört yüz akçeyi mezbûr Mehmed Ağa yedinden tamâmen ahz ve kabz eylediğimizden sonra zikr olunan tarlaları mahallinde zabt ve tasarrufa mezbûr Mehmed Ağa’yı taslît eyledim dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-âşir min Muharremi’l-harâm li sene ihdâ ve seb‘în ve elf.
Şuhûdü’l-hâl: Ömer Efendi b. İvaz, Mustafa Çelebi b. Ömer, Mustafa Çelebi b. Mehmed, İbrahim Ağa b. ( ) tâbi‘-i Ali Ağa, Ramazan Beşe b. Kâmil, el-Hâc Ahmed b. Abdullah.
|