.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 284
Hüküm no: 305
Orijinal metin no: [44a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Çavuş b. Ahmed’in, vefat eden Musli Efendi b. Hasan’a olan borcunu vârislerine ödediği

Mahmiye-i İstanbul’da Hoca Hayreddin mahallesi sâkinlerinden iken bundan akdem fevt olan Musli Efendi b. Hasan nâm müteveffânın verâseti zevce-i metrûkesi Hatice bt. Abdullah nâm hâtun ile sulbiye kebîre kızı Havva’ya ve sagīre kızları Ümmühâni ve İsmihân’a münhasıra olduğu lede’ş-şer‘i’l-mutahhar zâhir ve mütehakkik oldukdan sonra mezbûre Havva tarafından husûs-ı âti’l-beyânı ikrâra vekîl olup hasm-ı câhid-i şer‘î mahzarında zât-ı merkūmeyi ma‘rifet-i şer‘iyye ile ârifân olan Mustafa Usta b. İbrahim ve Mehmed b. Şaban şehâdetleriyle şer‘an vekâleti sâbite olan Ali Ağa b. Ahmed vekâleten ve sagīretân-ı mezbûretânın tesviye-i umûrları için kıbel-i şer‘den mansûb vasîleri ve merkūme Hatice tarafından dahi kezâlik husûs-ı âti’l-beyânı ikrâra vekîl olup hasm-ı münkir muvâcehesinde mezbûrenin zâtını ma‘rifet-i şer‘iyye ile ârifân olan şâhidân-ı mezbûrân şehâdetleriyle şer‘an vekâleti sâbite olan Mustafa Çelebi b. Receb dahi vesâyeten ve vekâleten meclis-i şer‘-i şerîf-i enverde medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Çavuş Kasım mahallesinde sâkin olan işbu râfi‘ü’l-kitâb Mehmed Çavuş b. Ahmed mahzarında her biri vekâleten ve vesâyeten ikrâr-ı tâm ve takrîr-i kelâm edip mezbûr Mehmed Çavuş müteveffâ-yı mezbûr Musli Efendi’den hâl-i hayâtında yedi yüz esedî guruş istikrâz ve ahz ve kabz edip medîne-i mezbûrede vâki‘ merhûm Abdülkādir Efendi vakfı’ndan icâre-i mu‘accele ve müeccele ile taht-ı tasarrufunda olup Balaban Bostanı demekle mu‘arref bostanı ma‘rifet-i mütevellî ile müteveffâ-yı mezbûre bi tarîki’r-rehin tefvîz ve ferâğ ol dahi ber vech-i muharrer tefevvuz ve kabûl ettikden sonra meblağ-ı mezkûrun altı yüz guruşunu dahi mezbûr Mehmed Çavuş müvekkiletân-ı mezbûretân ile sagīretân-ı merkūmetânın vasîleri mezbûr Mustafa Çelebi’ye tamâmen edâ ve teslîm edip meblağ-ı mezkûr yedi yüz esedî guruşdan zimmetinde bir akçe ve bir habbe bâkī kalmamağın bostan-ı mezkûrun temessükü verese-i mezkûrât yedlerinde zâyi‘ olmağla vakf-ı mezbûr mütevellîsinden müceddeden temessük alıp müvekkiletân-ı mezbûretân ile vasiyy-i merkūm Mustafa Çelebi bostan-ı mezkûru yine mezbûr Mehmed Çavuş’a ma‘rifet-i mütevellî ile ferâgat ve tefvîz eylediler dediklerinde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sâdis min Muharremi’l-harâm li sene ihdâ ve tis‘în ve elf.


Şuhûdü’l-hâl: Mehmed b. Veli, Ali b. Mehmed, İbrahim Efendi b. Hasan, Mehmed b. Eyüb, Hasan b. Abdullah, Mehmed b. Mahmud, Dilâver b. Abdullah, Hüseyin b. Ali ve gayruhüm.