|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 285 Hüküm no: 307 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed b. Receb’in evini Hüseyin b. İshak’a satması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Ahmed Dede mahallesi sâkinlerinden Mehmed b. Receb nâm kimesne meclis-i şer‘-i hatîr-i lâzımü’t-tevkīrde işbu râfi‘ü’l-kitâb Hüseyin b. İshak nâm kimesne mahzarında tav‘an ikrâr-ı tâm ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafdan Süleyman Kethüdâ mülkü ve bir tarafdan mezbûr Hüseyin mülkü ve bir tarafdan Ekmekçibaşı mülkü ve bir tarafdan tarîk-i hâs ile mahdûd bir fevkānî oda ve altında ahırı ve bir sofa ve bi’r-i mâ ve cüneyneyi müştemil menzilimi cemî‘ tevâbi‘ ve levâhıkıyla merkūm Hüseyin’e altmış kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezkûr altmış guruşu mezbûr Hüseyin yedinden tamâmen ahz ve kabz eyledim ba‘de’l-yevm menzil-i mahdûd-ı mezkûrda vechen mine’l-vücûh alâkam kalmadı mezbûr Hüseyin’in mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-hâdî aşer min Muharremi’l-harâm li sene ihdâ ve tis‘în ve elf.
Şuhûdü’l-hâl: Mahmud b. Hüseyin, Abdurrahman b. Mehmed, Ahmed b. Mahmud, Nasuh b. İvaz, Süleyman Kethüdâ b. ( ), Hasan b. Abdullah.
|