Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 361 Hüküm no: 412 Orijinal metin no: [57b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc İbrahim Halife b. Halil ile Abdurrahman Efendi b. Osman’ın, el-Hâc Mustafa b. Mahmud ve Mehmed Beşe b. Hamza’nın ticarî işlerinde borç ve alacaklara şahitlik ettikleri Mahmiye-i İstanbul’da Kadırga Limanı kurbunda Çadırcı Ahmed mahallesinde vâki‘ merhûm Behram Çavuş mescid-i şerîfi müezzini olan el-Hâc İbrahim Halîfe b. Halil ve Atmeydanı kurbunda vâki‘ Üçler mescid-i şerîfi imâmı olan Abdurrahman Efendi b. Osman nâm kimesneler meclis-i şer‘-i şerîf-i Ahmedî ve mahfil-i dîn-i münîf-i Muhammedî’de mahmiye-i mezbûrede Dizdâriye mahallesi ahâlîsinden olup ticâret için mahrûse-i Edirne’ye gitmek üzre olan el-Hâc Mustafa b. Mahmud ve Mehmed Beşe b. Hamza nâm kimesneler mahzarlarında her biri ikrâr ve takrîr-i kelâm edip cezîre-i Kıbrıs’da Girne kazâsından münfasıl olup hâlâ mahrûse-i mezbûrede mülâzemetde olduğu mesmû‘umuz olan Asesî Dedeoğlu demekle ma‘rûf Mehmed Efendi nâm kimesne târih-i kitâbdan iki sene mukaddem zikr olunan Behram Çavuş mescid-i şerîfi önünde mârrü’z-zikr Çadırcı Ahmed mahallesi ahâlîsinden olup hâlâ mahrûse-i mezkûre de olan Veli Bey b. Abdullah mukaddemâ yedinden iştirâ ve kabz ettiğim beynimizde ma‘lûm elli donluk Kıbrıs dimisi semeninden elli riyâlî guruş ve bir Kıbrıs cibinliği semeninden seksen riyâlî guruş deyni olduğunu bizim huzûrumuzda ikrâr etmekle, biz mezbûr Mehmed Efendi’nin vech-i mübeyyen üzre cihet-i mezbûreden mezbûr Veli Bey’e yüz otuz riyâlî guruş deyni olduğunu ikrârında şâhidleriz şehâdet dahi ederiz, lâkin bizim mahrûse-i mezbûreye azîmetimiz olmağla mahrûse-i mezbûreye vardığınızda bizim lisânımızdan vech-i mübeyyen üzre mahallinde şehâdet edin deyû her biri vech-i meşrûh mübeyyen üzre olan şehâdetlerini mezbûrân el-Hâc Mustafa ve Mehmed Beşe’den her birine tahmîl edip mezbûrân el-Hâc Mustafa ve Mehmed Beşe’den her biri dahi merkūmân el-Hâc İbrahim Halîfe ve Abdurrahman Efendi’den her birinin vech-i meşrûh üzre olan şehâdetlerini tahmîl edip mahallinde merkūmân el-Hâc İbrahim Halîfe ve Abdurrahman Efendi’nin şehâdetleri üzre edâ-i şehâdete ta‘ahhüd etmeğin mâ hüve’l-vâki‘ bi’l-ibtigā ketb ve imlâ olundu. Fi’l-yevmi’l-hâdî aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Umdetü’l-akrân Şaban Ağa b. Süleyman Ser-muhzırân, fahrü’l-akrân Mehmed Çelebi b. Abdülmennân Kethüdâ-yı muhzırân, Şükrullah Bey b. Mustafa, İbrahim Çelebi b. Ahmed.