.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 286
Hüküm no: 309
Orijinal metin no: [44b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vefat eden Mustafa’nın vârislerinin miras evini Veli b. Sadık ile Fâtıma bt. Abdullah’a satmaları

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Sofular mahallesi sâkinlerinden iken bundan akdem fevt olan Mustafa b. ( ) nâm kimesnenin verâseti zevce-i metrûkesi Selime bt. Hasan nâm hâtun ile sulbî kebîr oğlu Osman’a münhasıra olduğu şer‘an zâhir ve mütehakkik oldukdan sonra merkūmân Osman ve Selime meclis-i şer‘-i hatîr-i lâzımü’t-tevkīrde tasdîk-i câ’i’z-zikre kendi tarafından asıl ve zevcesi Fâtıma bt. Abdullah nâm hâtun tarafından vekîl olup vekâleti ber nehc-i şer‘î sâbite olan işbu bâ‘isü’l-kitâb Veli b. Sadık nâm kimesne mahzarında her biri tâyi‘an ikrâr-ı tâm ve takrîr-i kelâm edip mahalle-i mezbûrede vâki‘ bir tarafı Babazâde Mehmed b. Mustafa mülkü ve bir tarafı Derviş Abdullah mülkü ve bir tarafı tarîk-i hâs ve taraf-ı râbi‘i tarîk-i âm ile mahdûd iki fevkānî oda ve bi’r-i mâ ve cüneyneyi müştemil mülk-i mevrûs menzilimizi cemî‘ tevâbi‘ ve levâhıkı ile merkūmân Veli ile zevcesi Fâtıma’ya ale’l-iştirâki’s-seviy on sekiz bin beş yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip anlar dahi ber vech-i muharrer iştirâ ve tesellüm ve kabûl eylediklerinden sonra semeni olan meblağ-ı mezkûr on sekiz bin beş yüz akçeyi merkūmân yedlerinden tamâmen ahz ve kabz eyledik ba‘de’l-yevm sâlifü’z-zikr menzil-i mezbûr Veli ve zevcesi Fâtıma’nın mülk-i müşterâlarıdır keyfe mâ yeşâ’ân mutasarrıf olsunlar dediklerinde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’l-âşir min Muharremi’l-harâm li sene ihdâ ve tis‘în ve elf.


Şuhûdü’l-hâl: Abdullah Halîfe b. ( ) el-İmâm, Şaban Bey b. Mustafa, Ahmed Efendi b. Mehmed el-İmâm, Receb b. Hasan, Murtaza Halîfe b. Veli, Musa b. Osman, Hüseyin b. Abdullah, Mehmed Çelebi b. Hasan ve gayruhüm.