|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 287 Hüküm no: 310 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ali Bey b. Mehmed’in evini Kâtip Bâli Vakfı’na satması
Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Takyecibaşı mahallesi sâkinlerinden Ali Bey b. Mehmed nâm kimesne meclis-i şer‘-i hatîr-i lâzımü’t-tevkīrde mahmiye-i İstanbul’da Kâtib Bâli nâm sâhibü’l-hayrın nukūd-ı mevkūfesine berât-ı âlîşân ile bi’l-fi‘l mütevellî olan işbu râfi‘ü’l-kitâb umdetü’l-emâcid ve’l-e‘âlî Abdi Ağa b. el-Hâc Ahmed mahzarında bi’t-tav‘i’s-sâf ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik ve semt-i hakk-ı sarîhimde münharıt olup mahalle-i mezbûrede vâki‘ bir tarafı ba‘zan Âişe Hâtun ve ba‘zan Mezarcızâde Mustafa Çelebi zevcesi mülkleri ve ba‘zan Abdi Efendi oğlu tasarrufunda olan vakıf menzil ve ba‘zan Süleyman Çelebi zevcesi mülkleri ve ba‘zan zevcem İsmihân Hâtun mülkü ve bir tarafdan Mustafa Ağa b. Abdurrahman mülkü ve bir tarafı ba‘zan tarîk-i hâs ve ba‘zan tarîk-i âm ile mahdûd olup dâhiliyyede üç fevkānî odaları ve bir sofa ve dehliz ve dört tahtânî odaları ve bi’r-i mâyı ve bahçeyi ve hâriciyyede bir tahtânî oda ve ahırı müştemil menzilimi cemî‘ tevâbi‘ ve levâhıkı ve kâffe-i hukūk ve merâfıkı ile mütevellî-i mûmâ-ileyh Abdi Ağa’ya yedi yüz on kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vakf-ı mezkûr malıyla ber vech-i muharrer iştirâ tesellüm ve kabûl eyledikden sonra semeni olan meblağ-ı mezkûr yedi yüz on guruşu mütevellî-i mûmâ-ileyh Abdi Ağa yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mezkûrda vechen mine’l-vücûhi’ş-şer‘iyye alâka ve medhalim kalmadı mütevellî-i mûmâ-ileyh vakf-ı mezbûrun akārâtından olmak üzre vakıf için mutasarrıf olsun dedikde gıbbe’t-tasdîki’ş-şer‘î mâ vaka‘a kayd şüd. Fi’l-yevmi’s-sâlis ve’l-ışrîn min Zilhicceti’ş-şerîfe li sene tis‘în ve elf.
Şuhûdü’l-hâl: Mustafa Ağa b. Abdurrahman, Mehmed Efendi b. Mustafa, Hasan Efendi b. Muhyiddin, Hasan Ağa b. el-Hâc Ahmed, Himmet Beşe b. Ali, Mustafa Ağa b. Abdurrahman, Yusuf Beşe b. İbrahim, Ramazan b. İsmail, Yusuf b. Ali ve gayruhüm.
|