.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 292
Hüküm no: 316
Orijinal metin no: [46b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yorgaki v. Dimitri’nin evini Nano v. Manolbezya’ya sattığı

Fi’l-asl vilâyet-i Rumeli’nde kasaba-i Göllükesri mahallâtından Varlağam mahallesi ahâlîsinden olup hâlâ mahmiye-i İstanbul hısnı ebvâbından Fenerkapısı hâricinde Abdi Subaşı mahallesinde müsâfiren sâkin olan Yorgaki v. Dimitri nâm zimmî meclis-i şer‘-i şerîfde işbu râfi‘ü’r-rakīm Nano v. Manolbezya nâm zimmî muvâcehesinde tav‘an ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Tolko v. Sarko nâm zimmî mülkü ve bir tarafdan yeri Lefter v. Kavali nâm zimmî mülkü ve bir tarafdan ba‘zan Rali v. Yorgi nâm zimmî mülkü ve ba‘zan göl ve bir tarafdan tarîk-i âm ile mahdûd iki bâb fevkānî oda ve altında mahzeni ve havluyu ve zât eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ile merkūm Nano’ya beş yüz kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi ber vech-i muharrer iştirâ ve kabûl eyledikden sonra semeni olan meblağ-ı mezbûr beş yüz esedî guruşu mezbûr Nano yedinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûr[d]a alâka ve medhalim yokdur, mezbûr Nano’nun mülk-i müşterâsı olmuşdur keyfe mâ yeşâ’ ve yahtâr mahallinde zabt ve tasarrufa mesfûr Nano’yu taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn mine’l-Muharremi’l-harâm li sene ihdâ ve tis‘în ve elf.


Şuhûdü’l-hâl: Hibetullah Efendi, Hasan Çelebi b. Mustafa, Hasan Çelebi b. Mustafa, Ahmed b. Nasuh ve gayruhüm.