|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 293 Hüküm no: 317 Orijinal metin no: [46b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Fâtıma bt. Abdullah ile Musa Çelebi b. İsmail’in boşanması
Medîne-i Hazret-i Ebâ Eyyûb el-Ensârî’de Evlice Baba mahallesinde sâkine Fâtıma bt. Abdullah nâm hâtun meclis-i şer‘-i şerîfde zevci işbu râfi‘ü’l-kitâb Musa Çelebi b. İsmail mahzarında bi tav‘ihâ ikrâr ve takrîr-i kelâm edip mezbûr Musa Çelebi zevcim olup lâkin beynimizde hüsn-i zindegânemiz olmamağla zimmetinde mütekarrir ve ma‘kūdun-aleyh olan bin altı yüz akçe mühr-i müeccel hakkım ile bin yüz akçe kıymetli bir sîm ön kuşağım üzerlerine ve nafaka-i iddet-i mu‘ayyenem ve me’ûnet-i süknâm dahi kendi üzerime olmak üzre mezbûr Musa Çelebi ile muhâla‘a-i sahîha-i şer‘iyye ile hul‘ olup zimmetini hukūk-ı zevciyyete ve sâlifü’z-zikr kuşağa müte‘allika âmme-i da‘vâdan ibrâ-i âm ile ibrâ ve iskāt eyledim dedikde ol dahi hul‘-ı mezbûru kabûl etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn mine’l-Muharremi’l-harâm li sene ihdâ ve tis‘în ve elf.
Şuhûdü’l-hâl: Mehmed Efendi b. Ahmed el-İmâm, Abdullah Çelebi el-Müezzin, Mehmed b. Ali, Mahmud b. Musa, Ali b. Abdullah, Mehmed b. Eyüb, Mehmed b. Mahmud ve gayruhüm.
|