.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 293
Hüküm no: 318
Orijinal metin no: [47a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hatice bt. Mehmed’in evini Sefer b. Abdullah ile eşi Râziye bt. Abdullah’a satması

Medîne-i Hazret-i Ebâ Eyyûb el-Ensârî’de Evlice Baba mahallesinde sâkine Hatice bt. Mehmed nâm hâtun meclis-i şer‘-i şerîfde işbu bâ‘isü’l-vesîka Sefer b. Abdullah ile zevce-i menkûhası Râziye bt. Abdullah mahzarlarında ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafı Haffâf Receb mülkü ve bir tarafı İbrahim Çelebi mülkü ve bir tarafı yine benim âhar mülküm ve bir tarafı tarîk-i âm ile mahdûd bir bâb tahtânî oda ve müşterek bi’r-i mâyı müştemil mülk menzilimi cemî‘ tevâbi‘ ve levâhıkı ile mezbûr Sefer ile zevcesi mezbûr Râziye ale’l-iştirâki’s-seviy altmış esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm anlar dahi ber vech-i muharrer iştirâ ve tesellüm ve kabz eylediklerinden sonra semeni olan meblağ-ı mezbûr altmış esedî guruşu mezbûrân yedlerinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur, min ba‘d Sefer ile zevcesi mezbûre Râziye’nin ber vech-i iştirâk mülk-i müşterâları olmuşdur keyfe mâ yeşâ’ mutasarrıf olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Muharremi’l-harâm li sene ihdâ ve tis‘în ve elf.


Şuhûdü’l-hâl: Mehmed Efendi b. Ahmed el-İmâm, Abdullah Çelebi el-Müezzin, Ahmed beşe b. ( ), Ramazan b. Ali, Mustafa b. Mehmed, Ahmed b. Abdullah, Ali Bey b. Osman.