Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 362 Hüküm no: 413 Orijinal metin no: [57b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zülfikāre bt. Ali’nin kocası Ali Çelebi b. Hızır’da nafaka ve mehirden alacaklı olduğu Fi’l-asl medîne-i Bursa’da İnebey mahallesi sükkânından olup mahmiye-i İstanbul’da ( ) mahallesinde müsâfireten sâkine olan Zülfikāre bt. Ali nâm hâtun meclis-i şer‘-i hatîr-i lâzımü’t-tevkīrde zevci Ali Çelebi b. Hızır nâm kimesne mahzarında üzerine da‘vâ ve takrîr-i kelâm edip zevcim merkūm Ali Çelebi üzerine mukaddemâ hâkimü’ş-şer‘a takdîr et[tir]diğim yevmî onar akçe nafaka-i mefrûza-i müstedânemden dokuz ayda zimmetinde müctemi‘ olan iki bin yedi yüz akçe hakkımı zevcim merkūm Ali Çelebi’den taleb ederim suâl olunsun dedikde, gıbbe’s-suâl merkūm Ali Çelebi cevâbında fi’l-vâki‘ zevcim müdde‘iyye-i merkūmenin dokuz ayda zimmetinde müctemi‘ olan nafaka-i mefrûza-i müstedânesinden iki bin yedi yüz akçe hakkı vardır deyû bi tav‘ihî ikrâr etmeğin mûcebince meblağ-ı mezbûr iki bin yedi yüz akçeyi müdde‘iyye-i mezbûre Zülfikāre’[ye] edâ ve teslîme merkūm Ali Çelebi’ye tenbîh birle mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Mustafa Çavuş b. Abdullah el-Mübâşir, Mehmed Çelebi b. Abdülmennân Kethüdâ-yı muhzırân, Baba Resul b. Rıdvan Du‘âcı, İbrahim Çelebi b. Ahmed, Süleyman Çelebi b. Ahmed, Hasan Çelebi b. Ahmed.