|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 294 Hüküm no: 319 Orijinal metin no: [47a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Sefer b. Abdullah’ın evini Selim b. Hasan’a satması
Medîne-i Hazret-i Ebâ Eyyûb el-Ensârî’de Evlice Baba mahallesinde sâkin Sefer b. Abdullah meclis-i şer‘-i şerîfde işbu bâ‘isetü’l-vesîka Selime bt. Hasan nâm hâtun muvâcehesinde ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafı kebabçı Mehmed mülkü ve bir tarafı Mehmed b. Abdullah mülkü ve bir tarafı Kasım Reis mülkü ve bir tarafı tarîk-i âm ile mahdûd bir bâb fevkānî oda ve iki bâb tahtânî oda ve bir bâb cüneyneyi müştemil mülk menzilimi cemî‘ tevâbi‘ ve levâhıkı ile mezbûre Selime Hâtun’a yedi bin yedi yüz fıddî râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz eyledikden sonra semeni olan meblağ-ı mezbûr yedi bin yedi yüz akçeyi yedinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda alâkam ve medhalim yokdur, mezbûre Selime Hâtun’un mülk-i müşterâsı olmuşdur keyfe mâ yeşâ’ mutasarrıfe olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn mine’l-Muharremi’l-harâm li sene ihdâ ve tis‘în ve elf.
Şuhûdü’l-hâl: Mehmed Efendi b. Ahmed el-İmâm, Abdullah Halîfe el-Müezzin, Ahmed b. Ramazan Mustafa b. Mehmed, Ahmed b. Abdullah, Ali Bey b. Osman ve gayruhüm.
|