.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 295
Hüküm no: 320
Orijinal metin no: [47a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hüseyin b. Sinan’ın terekesini amcasının oğlu Mustafa b. Ali’nin beytülmâl emininden teslim alması

Fi’l-asl vilâyet-i Rumeli’nde İlbasan kazâsına tâbi‘ Kavas nâm karyeden olup hâlâ mahmiye-i İstanbul’da Zeyrek kurbunda Çinili odalarında sâkin olan Mustafa b. Ali nâm kimesne mahfil-i kazâda Havâss-ı Aliyye kazâsına tâbi‘ kasaba-i Midye’de beytülmâl-i âmme ve hâssa emîni olan işbu râfi‘ü’l-kitâb Hüseyin Bey b. Yusuf mahzarında tav‘an ikrâr-ı tâm ve takrîr-i kelâm edip fi’l-asl karye-i mezbûre ahâlîsinden li ebeveyn ammim Hüseyin b. Sinan’ın sulbî kebîr oğlu olup kasaba-i mezkûrede kömürcülük kârı üzre iken bundan akdem fevt olan Ali nâm müteveffânın verâseti min ciheti’l-usûbeti’n-nesebiyye bana münhasıra olmağla emîn-i mezbûr Hüseyin Bey mûrisim müteveffâ-yı mezbûrun terekesine hîn-i fevtinde vaz‘-ı yed etmeğin ben dahi müteveffâ-yı mezbûrun hasren vârisi olduğum emîn-i mezbûrun muvâcehesinde şuhûd-ı udûl ile makbûzu olan tereke-i müteveffâ-yı mezbûru bana teslîme taraf-ı şer‘den tenbîh olunmuşidi el-hâletü hâzihî emîn-i mezbûr Hüseyin Bey’in ber mûceb-i defter-i kassâm makbûzu olan sekiz bin beş yüz yirmi altı akçeyi emîn-i mezbûrun yedinden bi’t-tamâm ve’l-kemâl ahz ve kabz eyledim defter-i mezkûrda mastûr olan meblağ-ı mezkûrdan emîn-i mezbûrun yedinde ve zimmetinde bir akçe ve bir habbe bâkī kalmadı dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis ve’l-ışrîn mine’l-Muharremi’l-harâm li sene ihdâ ve tis‘în ve elf.


Şuhûdü’l-hâl: Hasan Ağa b. Hüseyin el-Mübâşir, Sefer Ağa b. Abdullah, Mehmed Bey b. Hasan, Mehmed b. Mahmud, Hasan b. Abdullah ve gayruhüm hâzırîn.