.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 295
Hüküm no: 321
Orijinal metin no: [47a-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Koçu v. Yani’nin bağını Dimo v. Kosta’ya satması

Vilâyet-i Rumeli’nde Göllükesri kazâsına tâbi‘ Kilisora nâm karye ahâlîsinden Koçu v. Yani nâm zimmî meclis-i şer‘-i şerîfde işbu râfi‘ü’r-rakīm Dimo v. Kosta nâm zimmî muvâcehesinde ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafı Yani v. Yorgi nâm zimmî bağı ve bir tarafı Kako v. Niko nâm zimmî bağı ve bir tarafı Dimo v. Yani nâm zimmî bağı ve bir tarafı Komino v. Paliçe nâm zimmî bağı ile mahdûd tahmînen bir buçuk dönüm bir kıt‘a mülk bağımı, cemî‘ tevâbi‘ ve levâhıkı ile mezbûr Dimo’ya dokuz yüz fıddî râyic fi’l-vakt akçeye bey‘ ve temlîk edip ol dahi minvâl-i muharrer üzre iştirâ ve temellük ve kabûl eyledikden sonra semeni olan meblağ-ı mezbûr dokuz yüz akçeyi mersûm Dimo yedinden bi’t-tamâm ve’l-kemâl ahz ve kabz eyledim ba‘de’l-yevm zikr olunan bağda alâka ve medhalim yokdur, mezbûr Dimo’nun mülk-i müşterâsı olmuşdur keyfe mâ yeşâ’ mahallinde zabt ve tasarrufa mezbûr Dimo’yu taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis ve’l-ışrîn min Muharremi’l-harâm li sene ihdâ ve tis‘în ve elf.


Şuhûdü’l-hâl: Mehmed b. Eyüb, Mehmed b. Mahmud, Hüseyin b. Ali, Ali b. Abdullah, Dilâver b. Abdullah, Yorgo [v.] Yano, Yano [v.] İstiko, Yorgi [v.] Komano, Kiryazo [v.] Avyaro, Koçu [v.] Niço, Andriye [v.] İstiko ve gayruhüm.