.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 297
Hüküm no: 325
Orijinal metin no: [47b-4]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mustafa b. Mehmed’in sarhoş olup kendisini uyaran mahalle imamını taciz ettiği

Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî-’de el-Hâc Hüsrev mahallesi imâmı işbu râfi‘ü’l-kitâb Mustafa Efendi b. Hüseyin meclis-i şer‘-i şerîfde yine mahalle-i mezbûre sükkânından diğer Mustafa b. Mehmed mahzarında üzerine da‘vâ ve takrîr-i kelâm edip mezbûr Mustafa kendi hâlinde olmayıp dâimâ sâkin olduğu menzile kendine nâ-mahrem avrat getirip şürb-i hamr ile fısk [u] fücûr edip mezbûr Mustafa’ya birkaç def‘a tenbîh edip mütenebbih olmadığından mâ‘adâ târih-i kitâb günü vakt-i asırda sakalımı yolup vâlideme ve avratıma cimâ‘ lafzı ile şetm etmeğin bana âr lâhık olmuşdur suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr, müdde‘î-i mezbûr Mustafa Efendi’den da‘vâsına mutâbık beyyine taleb olundukda udûl-i ricâl-i müslimînden Halil Çelebi b. Hüseyin ve Süleyman b. Mehmed ve Mustafa b. Receb ve Mehmed b. Abdüsselâm nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka târih-i mezbûrda müdde‘î-i mezbûr Mustafa Efendi merkūm diğer Mustafa’ya, sen dâimâ menziline nâ-mahrem avratlar getirip şürb-i hamr ile fısk u fücûr eylersin etme deyû tenbîh eylediğinde müdde‘î-i mezbûr Mustafa Efendi’nin bizim huzûrumuzda sakalını yolup vâlidesine ve avratına cimâ‘ lafzı ile şetm eyledi biz bu husûsa bu vech üzre şâhidleriz ve şehâdet dahi ederiz deyû her birerleri edâ-i şehâdet-i şer‘iyye eylelediklerinde gıbbe’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm mâ vaka‘a bi’t-taleb ketb olundu. Fi’l-yevmi’l-hâmis min Saferi’l-hayr li sene ihdâ ve tis‘în ve elf.


Şuhûdü’l-hâl: Mehmed b. Abdi, Mehmed b. Hüseyin, Abdülkādir b. Mehmed, Ahmed b. Mustafa, Abdi b. Bâli ve gayruhüm.