Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 362 Hüküm no: 414 Orijinal metin no: [57b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bogos v. Mankek’in, ortağı Aleksari v. Mercan’da alacağı olduğu iddiasını ispatlayamadığı Ekmekçi tâifesinden Bogos v. Mankek nâm Ermeni meclis-i şer‘-i şerîfde tâife-i mezbûreden bâ‘isü’s-sifr Aleksari v. Mercan nâm zimmî muvâcehesinde üzerine da‘vâ ve takrîr-i kelâm edip mezbûr Aleksari ve gāib ani’l-meclis Nehabet v. İsayi nâm zimmî ile şerîkler olup birkaç sene işleyip ba‘dehû fesh-i şirket edip hesâb gördüğümüzde yüz elli bin akçe zararımız olup her birimiz zararı malımızdan verdiğimizden sonra şirket-i mezbûre malından Yasir Reis ve Papuççuoğlu zimmetlerinde zuhûr eden sekiz bin akçe hakkımızı mezbûr Aleksari mezbûrlardan ahz u kabz etmekle suâl olunup meblağ-ı mezbûrdan iki bin altı yüz otuz üç akçe hakkımın mezbûr Aleksari’den alıverilmesi murâdımdır dedikde gıbbe’s-suâl mezbûr Aleksari vech-i mübeyyen üzre meblağ-ı mezkûrun kabzını inkâr edicek müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Aleksari’ye vech-i muharrer üzre mezbûrân Bogos ve Nehabet ile beynlerinde müşterek oldukları maldan mezbûrân Yasir Reis ve Papuççuoğlu zimmetlerinde olan sekiz bin akçeyi ahz u kabz etmeyip elân üzerinde müdde‘î-i mezbûrun husûmeti reddiyen zamân lâzım olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine mu‘ârazadan men‘ olunup mâ hüve’l-vâki‘ bi’l-ibtigā ketb ve imlâ olundu. Fi’l-yevmi’s-sânî aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Çelebi b. Abdullah, Şükrullah Bey b. Mustafa, İbrahim Çelebi b. Ahmed, Mehmed Bey b. Ramazan, Gazanfer Bey b. Tevekkül, Süleyman b. Hasan, Hasan b. Ahmed.