.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 301
Hüküm no: 331
Orijinal metin no: [48b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Vârisi olmayan Ârif Halife’nin evinin beytülmâlce satıldığı

Dergâh-ı âlî dâme mahfûfen bi’l-me‘âlî yeniçerileri beytülmâli kabzına memûr olan fahrü’l-emâsil ve’l-akrân Sefer Paşazâde Ali Ağa tarafından husûs-ı âti’l-beyâna vekîl olup hasm-ı câhid muvâcehesinde Mehmed Beşe b. Ahmed ve Mahmud Beşe b. Mehmed şehâdetleriyle şer‘an vekâleti sâbite olan Ahmed Çelebi b. Mehmed meclis-i şer‘-i hatîr-i lâzımü’t-tevkīrde işbu râfi‘ü’l-kitâb Ömer Beşe b. Eyüb mahzarında bi’l-vekâle ikrâr-ı tâm ve takrîr-i kelâm edip medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Şah Sultan mahallesinde vâki‘ bir tarafdan Yavaşça nâm sâhibetü’l-hayr vakfı olan menzil ve bir tarafdan çeşme ve bir tarafdan ( ) olan menzil ve bir tarafdan tarîk-i âm ile mahdûd bir bâb tahtânî oda ve bir sofa ve kenîf ve bir mikdâr havluyu müştemil menzil mahalle-i mezbûrede sâkin iken bundan akdem fevt olan zümre-i râcilînden Ârif Halîfe nâm müteveffânın mülkü olup ba‘de vefâtihî zâhirde vâris-i ma‘rûfu olmamağın cânib-i beytülmâle âid olmağla müvekkilem mûmâ-ileyh Ali Ağa menzil-i mezkûru beytülmâl için kabz etmişidi hâlâ menzil-i merkūm sûk-ı sultânîde ba‘de’l-müzâyede ve inkıtâ‘u’r-rağbete mezbûre Ömer Beşe üzerinde otuz üç buçuk esedî guruşda karâr edip ziyâde ile tâlib-i âhar zuhûr etmemekle müvekkilim mûmâ-ileyh dahi menzil-i mezkûru mezbûr Ömer Beşe’ye meblağ-ı mezbûr otuz üç buçuk guruşa bey‘-i kat‘î ile bey‘ ve teslîm ol dahi ber vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûru merkūm Ömer Beşe yedinden tamâmen ahz ve kabz eyledim ba‘de’l-yevm menzil-i mezkûr Ömer Beşe’nin mülk-i müşterâsıdır keyfe mâ yeşâ’ mutasarrıf olsun dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ min Saferi’l-hayr li sene ihdâ ve tis‘în ve elf.


Şuhûdü’l-hâl: Mehmed Ağa b. Ahmed el-Yesârî, Şaban Bey b. Mustafa, Receb b. Musa, Abdi b. Hasan ve gayruhüm.