.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 302
Hüküm no: 332
Orijinal metin no: [48b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Hanife bt. Mustafa’nın evini Mehmed Bey b. Mustafa’ya satması

Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Baba Haydar mahallesinde sâkine Hanife bt. Mustafa nâm hâtun tarafından menzil-i âti’l-beyânı bey‘a ve semenini kabza ve kendiye îsâle vekîl olup hasm-ı câhid mahzarında Mehmed Çelebi b. ve diğer Mehmed b. Bâli nâm kimesneler şehâdetleriyle şer‘an vekâleti sâbite olan Mustafa b. Abdülmennân meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Bey b. Mustafa mahzarında bi’l-vekâle ikrâr ve i‘tirâf edip akd-i âti’z-zikrin sudûruna değin müvekkilem mezbûre Hanife’nin silk-i mülk-i sahîhinde münselik olup medîne-i mezbûrede Nâzperver mahallesinde vâki‘ bir tarafı İsmail Çelebi b. Yakub mülkü ve bir tarafı Âişe bt. Abdullah nâm Hâtun mülkü ve bir tarafı Veli Bey mülkü ve bir tarafı tarîk-i âm ile mahdûd iki bâb fevkānî oda ve tahtında boş ve bir bâb tahtânî oda ve hamam ve bi’r-i mâ ve havluyu ve zât eşcâr-ı müsmire ve gayr-ı müsmire bahçeyi müştemil mülk menzilini cemî‘ tevâbi‘ ve levâhıkı ile mezbûr Mehmed Bey’e iki yüz elli esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr elli esedî guruşu vekâletim hasebiyle mezbûr Mehmed Bey yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda müvekkilem mezbûre Hanife Hâtun’un alâka ve medhali kalmadı müşterî-i mezbûr Mehmed Bey’in mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin min Saferi’l-hayr li sene ihdâ ve tis‘în ve elf.


Şuhûdü’l-hâl: Mehmed Efendi b. Yusuf, Ali b. Ahmed, Abdullah Efendi b. İbrahim, İbrahim Çelebi b. Mehmed Ağa.