|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 302 Hüküm no: 333 Orijinal metin no: [48b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Mehmed Çelebi b. Hasan’ın evini İslâm Bey Vakfı’na istiğlâl yoluylasatması
Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Kiremitçi Süleyman Çelebi mahallesinde sâkin Mehmed Çelebi b. el-Hâc Hasan meclis-i şer‘-i şerîfde medîne-i mezbûrede merhûm İslâm Bey vakfı’na bi’l-fi‘l mütevellî olan işbu bâ‘isetü’l-kitâb es-Seyyid Abdurrahman Efendi b. es-Seyyid Yakub Efendi mahzarında ikrâr ve i‘tirâf edip silk-i mülk-i sahîhimde münselik olup mahalle-i mezbûrede vâki‘ bir tarafı Şaban Çelebi b. Osman mülkü ve bir tarafı Solakzâde Mehmed Çelebi tasarrufunda olan menzil ve taraf-ı merhûm Mehmed Paşa bahçesi demekle ma‘rûf bahçe ve bir tarafı tarîk-i âm ile mahdûd mülk menzilimi cemî‘ tevâbi‘ ve levâhıkı ile mütevellî-i mezbûr es-Seyyid Abdurrahman Efendi’ye iki yüz esedî guruşa bi tarîki’l-istiğlâl bey‘ ve teslîm edip ol dahi vakf-ı mezbûr malıyla tarîk-i merkūm üzre iştirâ ve tesellüm ve kabz ve kabûl eyleyip semeni olan meblağ-ı mezbûr iki yüz esedî guruşu yedinden bi’t-tamâm ahz ve kabz eylediğimden sonra yine mütevellî-i mezbûr es-Seyyid Abdurrahman Efendi menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin otuz esedî guruşa bana îcâr ve teslîm ben dahi minvâl-i muharrer üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘î yine mahalle-i mezbûr sükkânından Mustafa Çelebi b. Mehmed mütevellî-i mezbûr es-Seyyid Abdurrahman Efendi mahzarında takrîr-i kelâm edip menzil-i mezkûrun derkine ve meblağ-ı mezbûr iki yüz guruşa [49a] ve ücret-i merkūmeye emr ve kabûlü hâviye kefâlet-i sahîha-i şer‘iyye ile kefîl ve zâmin oldum dedikde ba‘de’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min Saferi’l-hayr li sene ihdâ ve tis‘în ve elf.
Şuhûdü’l-hâl: İbrahim Beşe b. Abdullah Ahmed Çelebi b. ( ) el-Müezzin, Mehmed Efendi b. Süleyman, Mustafa Çelebi b. ( ) câbî ve gayruhüm.
|