.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 303
Hüküm no: 334
Orijinal metin no: [49a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Sefer Beşe b. Abdullah ile karısının, aldıkları borç karşılığında evlerini rehin göstermeleri

Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Evlice Baba mahallesi sükkânından Sefer Beşe b. Abdullah ile zevce-i menkûhası Râziye bt. Abdullah nâm hâtun meclis-i şer‘-i şerîfde işbu bâ‘isetü’l-kitâb Mehmed Efendi b. İbrahim tarafından ikrâr-ı âti’l-beyânı tasdîke vekîl olup nehc-i şer‘î üzre vekâleti sâbite olan Mustafa Çelebi b. Mehmed mahzarında her biri ikrâr ve i‘tirâf edip müvekkil-i mezbûr Mehmed Efendi’ye cihet-i karz-ı şer‘îden otuz beş esedî guruş ile yetmiş beş akçe zimmetimizde lâzımü’l-edâ deynimiz olup mukābelesinde ale’l-iştirâki’s-seviy silk-i mülk-i sahîhimizde münselik olup mahalle-i mezbûrede vâki‘ bir tarafı Haffâf Receb mülkü ve bir tarafı odabaşı mülkü ve bir tarafı Hasan ve Mehmed b. Ahmed mülkleri ve bir tarafı tarîk-i âm ile mahdûd mülk menzilimizi ba‘de’t-tahliyyeti’ş-şer‘iyye ve’t-tekābuzi’l-mer‘î müvekkil-i mezbûr Mehmed Efendi’ye meblağ-ı mezbûr otuz beş guruş ile yetmiş beş akçe mukābelesinde rehin vaz‘ ve teslîm ol dahi ber vech-i muharrer irtihân ve kabz ve tesellüm eyledi dedikde gıbbe’t-tasdîk. Fî 8 Safer sene [10]91.


Şuhûdü’l-hâl: Mehmed Efendi el-İmâm, Mehmed b. Mustafa, Mehmed b. Eyüb, Mehmed Beşe b. Mehmed ve gayruhüm.