.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 304
Hüküm no: 336
Orijinal metin no: [49a-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Mehmed Çelebi b. Süleyman’ın evini Pertev Paşa Vakfı’na bey‘ bi’l-vefâ yoluyla satması

Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Çavuş Kasım mahallesi sükkânından Mehmed Çelebi b. Süleyman Meclis-i şer‘-i şerîfde medîne-i mezbûrede merhûm Pertâb Paşa vakfı’na bi’l-fi‘l mütevellî olan işbu râfi‘atü’l-kitâb Mahmud Efendi b. Hasan tarafından ikrâr-ı âti’z-zikrin tasdîke vekîl-i sâbitü’l-vekâle Ahmed Çelebi b. Eyüb nâm kimesne mahzarında tav‘an ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ iki tarafdan Nalband Ali nâm kimesne mülkü ve iki tarafdan tarîk-i âm ile mahdûd fevkānî ve tahtânî üç bâb odaları ve sofa ve bi’r-i mâyı ve kenîfi ve eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ile mütevellî-i mezbûr Mahmud Efendi’ye yirmi kıt‘a esedî guruşa bi tarîki’l-istiğlâl bey‘ ve teslîm ol dahi vakf-ı mezbûr malıyla tarîk-i merkūm üzre iştirâ ve tesellüm ve kabûl eyleyip semeni olan meblağ-ı mezkûr yirmi guruşu mütevellî-i mezbûr Mahmud Efendi yedinden tamâmen ahz ve kabz eylediğimden sonra yine mütevellî-i mezbûr menzil-i mahdûd-ı mezkûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâb şehri gurresinden bir sene tamâmına değin iki guruş ücret ile bana îcâr ve teslîm ben dahi ber vech-i muharrer istîcâr ve tesellüm ve kabûl eyledim dedikde gıbbe’t-tasdîki’ş-şer‘î vekîl-i mezbûr Ahmed Çelebi takrîr-i kelâm edip menzil-i merkūmun derkine ve ücret-i mersûmeye emr ve kabûlü hâviye kefâlet-i sahîha-i şer‘iyye ile kefîl oldum dedikde mâ cerâ bi’l-ibtigā ketb olundu. Fi’l-yevmi’s-sâlis aşer li sene ihdâ ve tis‘în ve elf.


Şuhûdü’l-hâl: İsmail Efendi b. Resul, Halil b. Süleyman, Mehmed b. Yusuf, Mehmed b. Eyüb ve gayruhüm.