Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 363 Hüküm no: 415 Orijinal metin no: [57b-4, Arapça] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kocası kaybolan Havva bt. Abdullah’a ve üç çocuğuna nafaka takdir edildiği Mahmiye-i Kostantıniyye mahallâtından Çakır Ağa mahallesinde sâkine olan Havva bt. Abdullah nâm hâtun meclis-i şer‘-i şerîf ve mahfil-i dîn-i münîfe -el-masûn ani’t-tağyîr ve’t-tahrîf- hâzıre olup, bir müddetden beri gāib olan Mehmed b. Abdullah nâm zevcinin kendisine nafaka ve nafaka nev‘inden bir şey bırakmadığına dâir yemîn ettiğinde hâkim, mezbûrenin nafakası, kisvesi ve sâir havâic-i lâzımesi için zeylde mezkûr târihden i‘tibâren zevc-i gāibi üzerine yevmî râyicü’l-vakt beş akçe farz ve takdîr etti. Hâkim-i mûmâ ileyh ilâveten, zevc-i gāibden olma, mezbûre Havva’dan doğma İbrahim, Melekî ve Rukiye nâm sıgārın nafakaları için, anneleri ve hâdineleri mezbûre Havva’nın talebiyle, mezkûr babaları üzerine, her birine üçer akçe olmak üzre cem‘an dokuz akçe farz ve takdîr etti ve meblağ-ı mefrûz-i mezbûru sıgār-ı mezkûrînin havâic-i lâzımesine sarf etmeye ve vakt-i hâcette istidâne edip lede’z-zafer zevc-i gāibi mezbûr Mehmed’e rücû‘ etmeye merkūme Havva’ya izin verdi. Cerâ zâlike ve hurrire fi’l-yevmi’s-sânî aşere min Recebi’l-ferd sene seb‘a ve seb‘în ve elf. Şuhûdü’l-hâl: Hüseyin Çelebi b. Ahmed, İbrahim Çelebi b. Mehmed, Abdi Çelebi b. Hüseyin, Mehmed Çelebi b. Abdullah.