|
Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 306 Hüküm no: 338 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Totoş v. Dimo’nun evini Kosta v. Rado ile eşi Kasandra bt. Totoş’a satması
Havâss-ı Aliyye kazâsına tâbi‘ Avasya nâm karye ahâlîsinden Totoş v. Dimo nâm zimmî meclis-i şer‘-i şerîfde kendi tarafından asâlete ve zevcesi Kasandra bt. Totoş nâm nasrâniyye tarafından ikrâr-ı âti’l-beyânı tasdîke vekîl olup hasm-ı câhid muvâcehesinde İskerlet v. Riga ve Todori v. Panayot nâm zimmîler şehâdetleri ile şer‘an vekâleti sâbite olan işbu bâ‘isü’r-rakīm Kosta v. Rado nâm zimmî muvâcehesinde ikrâr ve takrîr-i kelâm edip silk-i mülk-i sahîhimde münselik olup karye-i mezbûrede vâki‘ bir tarafı Nikola zimmî mülkü ve bir tarafı İskerlet v. Riga zimmî mülkü ve bir tarafı Kostantin v. Yorgo zimmî mülkü ve bir tarafı tarîk-i âm ile mahdûd bir bâb fevkānî oda ve bir mahzen ve havluyu müştemil mülk menzilimi cemî‘ tevâbi‘ ve levâhıkı ile ale’l-iştirâki’s-seviy otuz esedî guruşa mezbûr Kosta ile zevcesi müvekkile-i mezbûre Kasandra’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip anlar dahi ale’l-iştirâki’s-seviy iştirâ ve tesellüm ve kabz eylediklerinden sonra semeni olan meblağ-ı mezbûr otuz esedî yedlerinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur mezbûr Kosta ile zevcesi müvekkile-i mezbûre Kasandra’nın ale’l-iştirâki’s-seviy mülk-i müşterâları olmuşdur keyfe mâ yeşâ’ mutasarrıf olsunlar dediğinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Saferi’l-hayr sene ihdâ ve tis‘în ve elf.
Şuhûdü’l-hâl: Hüseyin b. Ali, Mehmed b. Mahmud, Mehmed b. Eyüb, Ali b. Abdullah, İskerlet [v.] Riga, Zoto [v.] Celeb, Todori [v.] Panayot, Yanaki [v.] Kara, Nikola [v.] Mis?, Nikola [v.] Abacı, İstoyan [v.] Yorgos.
|