.:: İstanbul Kadı Sicilleri ::.


Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680)
cilt: 31, sayfa: 306
Hüküm no: 339
Orijinal metin no: [49b-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Totoş v. Dimo’nun evini Lisaro bt. Totoş ile eşi Kostantin v. Dimitri’ye satması

Havâss-ı Aliyye kazâsına tâbi‘ Avasya nâm karye ahâlîsinden Totoş v. Dimo nâm zimmî meclis-i şer‘-i şerîfde kendi tarafından asâleten ve zevcesi Lisaro bt. Totoş nasrâniyye tarafından ikrâr-ı âti’l-beyânı tasdîke vekîl olup hasm-ı câhid muvâcehesinde İskerlet v. Riga ve Todori v. Panayot nâm zimmîler şehâdetleri ile şer‘an vekâleti sâbite olan işbu bâ‘isetü’r-rakīm Kostantin v. Dimitri nâm zimmî muvâcehesinde ikrâr ve takrîr edip silk-i mülk-i sahîhimde münselik olup karye-i mezbûrede vâki‘ bir tarafı İstamo nâm zimmî mülkü ve bir tarafı İskerlet nâm zimmî mülkü ve bir tarafı Totoş nâm zimmî mülkü ve bir tarafı Kostantin nâm zimmî mülkü ile mahdûd bir bâb fevkānî sundurma ve bir mikdâr havluyu müştemil mülk menzilimi cemî‘ tevâbi‘ ve levâhıkı ile ale’l-iştirâki’s-seviy yirmi beş esedî guruşa mezbûr Kostantin ile zevcesi müvekkile-i mezbûre Lisaro’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip anlar dahi ale’l-iştirâki’s-seviy iştirâ ve tesellüm ve kabz eylediklerinden sonra semeni olan meblağ-ı mezbûr yirmi beş esedî guruşu yedlerinden bi’t-tamâm ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur, mezbûr Kostantin ile zevcesi müvekkile-i mezbûre Lisaro’nun ale’l-iştirâki’s-seviy mülk-i müşterâları olmuşdur keyfe mâ yeşâ’ mutasarrıf olsunlar dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Saferi’l-hayr li sene ihdâ ve tis‘în ve elf.


Şuhûdü’l-hâl: Es-Sâbikūn.