Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 364 Hüküm no: 416 Orijinal metin no: [57b-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Receb’in terekesi hususundaki davada vârisleri arasında sulh olduğu Mahmiye-i İstanbul’da Güngören mahallesinde sâkine iken bundan akdem vefât eden Fâtıma bt. Receb nâm hâtunun verâseti zevc-i metrûkü Mehmed Çelebi b. Musa ile li ebeveyn er karındaşı Mahmud Efendi b. Receb nâm kimesneye münhasıra olduğu şer‘an zâhir ve müte‘ayyin oldukdan sonra mezbûr Mehmed Çelebi mahfil-i kazâda müteveffât-ı mezbûrenin terekesine vâzı‘ü’l-yed olan işbu bâ‘isü’l-kitâb mezbûr Mahmud Efendi mahzarında ikrâr ve takrîr-i kelâm edip müteveffât-ı mezbûrenin terekesinden hisse-i şer‘iyyemi bundan akdem mezbûr Mahmud Efendi’den taleb ve da‘vâ eylediğimde ol dahi edâdan imtinâ‘ etmekle beynimizde münâza‘ât-ı kesîre cereyân etmişidi el-hâletü hâzihî vesâtat-ı muslihîn ile bi tarîki’t-tehârüci’ş-şer‘î mezbûr Mahmud Efendi beni bin akçe üzerine sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr bin akçeyi merkūm Mahmud Efendi yedinden tamâmen ahz u kabz eyleyip min ba‘d müteveffât-ı mezbûrenin terekesine müte‘allika olan âmme-i de‘âvî ve mütâlebât ve eymân ve muhâsamâtdan mezbûr Mahmud Efendi’nin zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî aşer min şehri Recebi’l-mürecceb li sene seb‘a ve seb‘în ve elf. Şuhûdü’l-hâl: Abdullah Efendi b. Mustafa, Mehmed Çelebi b. Mustafa, Ahmed b. Murtaza, Ali b. Mehmed.