Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 366 Hüküm no: 419 Orijinal metin no: [58a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Anton v. Mardiros’un, Sâliha Hatun bt. Abdullah’taki esvap bahasından alacağını tahsil ettiği Dârü’l-hilâfeti’l-aliyye Kostantıniyye el-mahmiyye’de bezzâzistân kurbunda kuyumcu olan Anton v. Mardiros nâm zimmî dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde, bâ‘isetü’l-kitâb Sâliha Hâtun bt. Abdullah mahzarında ikrâr-ı tâm ve takrîr-i kelâm edip yedimden müşterâ ve makbûz beynimizde ma‘lûm esvâb bahâsından mezbûre Sâliha Hâtun zimmetinde yüz altmış guruş hakkım vardır deyû bundan akdem da‘vâ etmiş idim el-hâletü hâzihî da‘vâ-yı mezbûreden mezbûre Sâliha Hâtun’un zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā kesb ve imlâ olundu. Fi’l-yevmi’s-sânî aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Ali Çavuş b. Yusuf, umdetü’l-a‘yân Eyüb Ağa b. Ahmed Kethüdâ-yı hazret-i efendi, Ramazan b. Hasan, Mehmed Beşe b. Mustafa, fahrü’l-akrân Şaban Ağa b. Süleyman, Hasan Beşe b. ( ) Çukadâr.