.:: İstanbul Kadı Sicilleri ::.


Bab Mahkemesi 3 Numaralı Sicil (H. 1077 / M. 1666 - 1667)
cilt: 17, sayfa: 370
Hüküm no: 425
Orijinal metin no: [59a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Kirkor v. Karnik’in kiracısı olan Karabit’in kaybolması üzerine dükkân içerisindeki eşyaların tespiti

Kavukçu tâifesinden Kirkor v. Karnik nâm zimmî meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip mahmiye-i İstanbul’da Sulu Manastır kurbunda Abdi Çelebi mahallesinde vâki‘ ma‘lûmü’l-hudûd mülküm olan attâr dükkânımda müste’cirim olan Karabit v. ( ) nâm zimmî târih-i kitâbdan altı ay mukaddem gaybet-i münkatı‘a ile gāib olup dükkân-ı mezbûr mukaffel ve mu‘attal kalmağın yedimde olan buyruldu-yı şerîf mûcebince kıbel-i şer‘den üzerine varılıp ba‘de’l-feth içinde mevcûd olan eşyâsı tahrîr ve bir kimesne kayyım nasb olunup emânet vaz‘ olunmak matlûbumdur dedikde, kıbel-i şer‘-i enverden mevlânâ Mehmed Efendi irsâl olunup ol dahi zeyl-i rakīmde muharrerü’l-esâmî olan Müslimîn ile dükkân-ı mezbûrun üzerine varıp ba‘de’l-feth içinde mevcûd olan eşyâsı tahrîr olunup yine mahalle-i mezbûre sükkânından Asvador v. Kirko nâm zimmîye emânet vaz‘ olunan eşyâmın defteridir ki zikr olunur. Fi’l-yevmi’s-sâdis aşer min Recebi’l-mürecceb li sene seb‘a ve seb‘în ve elf. Kilid 1 Boş kutu aded 14 Toprak tencere aded 35 Tennûr saksı 13 Toprak ibrik 7 Toprak şamdan 13 Kuşak tezgâhı 1 Demir cemşire? 1 Tarak 2 Çopur 4 Şişe 7 Def‘a şişe ma‘a gülâb 1


Şuhûdü’l-hâl: Mehmed Efendi b. Osman el-İmâm, diğer Mehmed Efendi b. Emrullah el-Müezzin, Mahmud b. Abdullah, Hüseyin b. Ebûbekir, Abdullah b. Ahmed, Avanos v. Sagar, Agya v. İsrail ve Todori v. Garel?.