Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 371 Hüküm no: 426 Orijinal metin no: [59a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Ahmed’in çocuklarına vasîsi olan Fâtıma bt. Mehmed’in kendinden önceki vasîde kalan malları aldığı Mahmiye-i İstanbul’da Kumkapı kurbunda İbrahim Şah mahallesinde sâkin iken bundan akdem vefât eden Mehmed Bey b. Ahmed nâm kimesnenin sulbî sagīr oğlu Ahmed ile sulbiye sagīre kızı Âişe’nin tesviye-i umûrlarına kıbel-i şer‘den mansûbe vasîleri ve vâlideleri olan Fâtıma bt. Mehmed nâm hâtun meclis-i şer‘-i enverde kendiden mukaddem sagīrân-ı merkūmânın vasîleri olup bundan akdem vefât eden el-Hâc Mehmed Bey b. Hasan’ın verâseti zevce-i metrûkesi Sâliha Hâtun bt. Ahmed ile sulbî sagīr oğlu Abdullah ile sulbiye sagīre kızı Hatice’ye münhasıra olduğu şer‘an zâhir ve mütehakkik oldukdan sonra sagīrân-ı mezkûrânın kıbel-i şer‘den mensûbe vasîleri ve tereke-i müteveffâ-yı mezbûre vâzı‘ü’l-yed olan bâ‘isetü’l-kitâb merkūme Sâliha mahzarında bi’l-vesâye ikrâr ve takrîr-i kelâm edip müteveffâ-yı mezkûr Hacı Mehmed Bey benden mukaddem hâl-i hayâtında sagīrân-ı mezkûrân Ahmed ve Âişe’nin vasîleri olmağla babaları müteveffâ-yı mezbûrdan kendilere intikāl eden dokuz yüz elli esedî guruşu bi’l-vesâye kabz etmişidi, hâlâ mezbûr el-Hâc Mehmed dahi vefât etmekle makbûzu olan meblağ-ı mezbûr dokuz yüz elli esedî guruşun merkūme Sâliha yedi yüz esedî guruşunu bana nakden teslîm ben dahi bi’l-vesâye ahz u kabz edip ve iki yüz esedî guruşu gāib ani’l-meclis Mehmed Ağa zimmetinden ve elli esedî guruşunu dahi Mustafa Efendi nâm kimesne zimmetinden bana gösterip ben dahi kabûl eylediğimden sonra mezbûr Mustafa Efendi zimmetinde olan meblağ-ı mezbûr elli esedî guruş mukābelesinde rehni olan bir sîm şamdan ile beynimizde ma‘lûm bir altın sagīr kuşağın dahi merkūme Sâliha bana def‘ ve teslîm ben dahi ahz ve tesellüm edip min ba‘d vasîleri olduğum sagīrân-ı mezbûrân Ahmed ve Âişe’nin malları olan meblağ-ı mezbûr dokuz yüz esedî guruşdan bir akçe ve bir habbe hakları kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Mehmed Efendi b. Sefer el-İmâm, Mehmed Halîfe b. Mustafa el-Müezzin, Osman b. Mehmed, Mehmed Efendi b. Mustafa, Mehmed Çelebi b. İbrahim, Sefer Halîfe, Hacı Ali b. Mehmed.