Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 372 Hüküm no: 427 Orijinal metin no: [59a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Asvador v. İskender’in, Sultan Mehmed Han Vakfı reâyâsı içine kaydolduğu ve cizyesini vakfa ödediği Mahmiye-i İstanbul’da ( ) mahallesinde sâkin işbu bâ‘isü’s-sifr Asvador v. İskender nâm zimmî meclis-i şer‘de vilâyet-i Anadolu’da medîne-i Kayseriye’ye tâbi‘ Mancusu nâm karye zimmîlerinin bin yetmiş yedi senesinde üzerlerine lâzım cizyesini cem‘a memûr olan ( ) Ağa tarafından karye-i mezbûre zimmîlerinden âhar diyârda olanların cizyeleri kabzına vekîl olduğu bimâ hüve tarîkü’s-sübût şer‘an sâbit olan Ogaşa v. Sultana nâm zimmî muvâcehesinde takrîr-i kelâm edip ben mukaddemâ karye-i mezbûrenin defterlü re‘âyâsından iken karye-i mezbûreden kat‘-ı alâka edip kalkıp mahmiye-i İstanbul’a gelip tavattun ettiğimden sonra mahmiye-i mezbûrede merhûm ve mağfûrun leh Ebü’l-feth Sultan Mehmed Hân -aleyhi’r-rahmetü ve’l-gufrân- hazretlerinin evkāfı re‘âyâsından kayd olunup birkaç seneden beri cizyemi vakf-ı mezbûr tarafına verir iken mezbûr Ogaşa cizye talebi ile beni rencîde edip mu‘ârazadan hâlî değildir, mezbûr Ogaşa’dan ba‘de’s-suâl yedimde olan mühürlü ve nişânlı deftere nazar olunup men‘ olunmak matlûbumdur dedikde, gıbbe’s-suâl mezbûr Ogaşa cevâbında mezbûr Asvador karye-i mezbûrenin defterlü zimmîlerinden olmağla cizyesini taleb ederim vakf-ı mezbûr re‘âyâsından olmak üzre deftere kayd olunduğu ma‘lûmum değildir, deyicek vakf-ı mezbûrun ma‘mûlün-bih mühürlü ve nişânlı sûret-i defterine nazar olundukda mezbûr Asvador’un kendi ismi ve babası ismi defter-i mezbûrda mastûr ve mukayyed olup mezbûr Asvador hâlâ vakf-ı [59b] mezbûr re‘âyâsından olduğu lede’ş-şer‘ zâhir ve mütebeyyin olmağın mûcebince mezbûr Ogaşa vech-i mübeyyen üzre mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’r-râbi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Şükrullah Çelebi [b.] Mustafa, Abdi Çelebi, İbrahim Çelebi b. Mehmed, Mehmed Bey Muhzır.