Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 373 Hüküm no: 428 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çavuş b. Ahmed’in, Mehmed b. Ahmed’in haksız olarak aldığı parasını geri ödemesi Vilâyet-i Anadolu’da Dodurga kazâsına tâbi‘ Zincir nâm karye ahâlîsinden Mehmed b. Ahmed nâm kimesne mahfil-i kazâda Ali Çavuş b. Ahmed nâm kimesne mahzarında üzerine da‘vâ ve takrîr-i kelâm edip târih-i kitâbdan altı ay mukaddem mezbûr Ali Çavuş mârrü’z-zikr Dodurga‘da ücret ile sâkin olduğu menzile beni ihzâr edip on altı buçuk esedî guruşum ile üç yüz elli hurda akçemi bi gayrı hakkın ahz etmişidi suâl olunup alıverilmek murâdımdır dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup mahmiye-i İstanbul’da Tarakçılar sûku sâkinlerinden Receb b. Mustafa ve Halil b. Eyüb nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr Mehmed’in vech-i muharrer üzre merkūm Ali Çavuş târih-i kitâbdan altı ay mukaddem menzil-i mezbûrda on altı buçuk esedî guruşu ile üç yüz elli hurda akçesini bi gayrı hakkın bizim huzûrumuzda ahz eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince meblağ-ı mezbûr on altı buçuk esedî ile üç yüz elli hurda akçeyi müdde‘î-i mezbûr Mehmed’e edâ ve teslîme mezbûr Ali Çavuş’a ba‘de’t-tenbîh mâ vaka‘a bi’t-taleb ketb olundu. Fi’l-yevmi’s-sâlis aşer min Recebi’l-ferd li sene seb‘a ve seb‘în ve elf. Şuhûdü’l-hâl: İbrahim Çavuş b. Abdullah, Hasan Çelebi b. Ahmed, Pîrî Çelebi b. Mustafa, Receb b. Sâlih, Musli b. Receb, Mustafa b. Turan.