Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 373 Hüküm no: 429 Orijinal metin no: [59b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yusuf b. Ahmed’in hür olduğunu ispatı Fazîletlü Efendi Hazretlerinin imzâsıyla Sâbıkan Mehmed ismi ile müsemmâ olup rıkkıyyetini mu‘terif olan orta boylu, açık kaşlı, elâ gözlü Yusuf b. Ahmed nâm bâliğ ve emred dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîf-i Ahmedî ve mahfil-i dîn-i münîf-i Muhammedî’de rakīk olmak üzre kendiye vâzı‘ü’l-yed olan Mustafa b. Hüseyin nâm kimesne mahzarında üzerine da‘vâ ve takrîr-i kelâm edip ben vilâyet-i Anadolu’da Boyabad kazâsına tâbi‘ Çâşnigirli nâm karye ahâlîsinden olup hür olan Ahmed’in zevce-i hürre olan Fâtıma nâm hâtundan mütevellid sulbî oğlu olup hürrü’l-asl iken mezbûr Mustafa rakīk olmak üzre bana bi gayrı hakkın vaz‘-ı yed eder suâl olunup kasr-ı yedine tenbîh olunup sebîlim tahliyye olunmak matlûbumdur dedikde, gıbbe’s-suâl mezbûr Mustafa mevsûf-ı mezbûru rıkka inkıyâdı olduğu hâlde vilâyet-i mezbûrda kasaba-i Lârende ahâlîsinden es-Seyyid Memi nâm kasabdan yüz yirmi guruşa iştirâ etmekle memlûküm olmak üzre vaz‘-ı yed ederim, vech-i muharrer üzre hür olduğu ma‘lûm değildir deyicek, mevsûf-ı mezbûrdan müdde‘âsını mübeyyine beyyine taleb olundukda fi’l-asl karye-i mezbûre sükkânından olup hâlâ mahmiye-i İstanbul’da Mehmed Ağa dârü’l-hadîsi’nde sâkin Mustafa Efendi b. Ramazan ve Maktul Hasan Paşa medresesi’nde sâkin Mehmed b. Mehmed nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka mevsûf-ı mezbûr karye-i mezbûre ahâlîsinden olup hür olan Ahmed nâm kimesnenin zevce-i menkûhası olup hürre olan Fâtıma nâm hâtundan mütevellid sulbî oğlu olup hürrü’l-asldır, üzerinden mezbûr Mustafa’nın yed-i mubtılasının kasr ve izâlesi lâzımdır, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebince mevsûf-ı mezbûrun vech-i mübeyyen üzre hürriyetine hükm olunup üzerinden mezbûr Mustafa’nın yed-i mubtılasının kasr ve izâlesine hükm olunup sebîli tahliyye olunmağın mâ vaka‘a bi’t-taleb ketb olundu. Fi’l-yevmi’s-sâlis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Umdetü’l-küttâb Ebûbekir Efendi Tezkireci-i evvel, fahrü’l-küttâb Mustafa Efendi Tezkireci-i Sânî, fahrü’l-akrân İsmail Ağa Serçavuş, fahrü’l-emâsil Eyüb Ağa Kethüdâ-yı efendi, Şaban Ağa Ser-muhzırân, Hacı Mustafa b. Mahmud, es-Seyyid Mehmed Çelebi b. Mehmed, Abdullah Çelebi b. Hacı Mehmed, Ömer b. el-Hâc Mehmed.