Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 374 Hüküm no: 430 Orijinal metin no: [59b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karakaş v. Seryani’nin kaynı Hasan’ı hapisten kurtarmak için Mehmed Efendi b. Derviş’e verdiği rüşvet parasını geri almadığı yolundaki davada haksız olduğu Tüccâr tâifesinden Karakaş v. Seryani nâm zimmî meclis-i hatîr-i lâzımü’t-tevkīrde işbu bâ‘isü’l-kitâb Mehmed Efendi b. Derviş nâm kimesne mahzarında üzerine da‘vâ ve takrîr-i kelâm edip bin yetmiş iki senesinde kaynım olan Hasan nâm kimesneyi bostancıbaşı bir husûs için haps etmekle merkūm Hasan’ı tahlîs ediver deyû merkūm Mehmed Efendi’ye bi tarîki’r-rüşve on bin akçe def‘ ve teslîm ol dahi yedimden ahz u kabz etmişidi, hâlâ meblağ-ı mezbûru merkūm Mehmed Efendi cevâbında fi’l-hakīka târih-i mezbûrda merkūm Hasan’ı tahlîs edivermek için merkūm Karakaş’dan meblağ-ı mezbûru ahz u kabz ettiğimden sonra yine kendiye def‘ ve teslîm etmişidim deyû def‘le mukābele edicek gıbbe’l-istintâk ve’l-inkâr merkūm Mehmed Efendi yedinden def‘-i mezbûrunu mübeyyine beyyine taleb olundukda udûl-i müslimînden olup mahmiye-i İstanbul’da Kabasakal Sinan Ağa mahallesi sükkânından Ahmed Ağa b. Mehmed ve mahmiye-i mezbûrede Hâcce Hâtun mahallesinde sâkin Mehmed b. Süleyman nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ merkūm Mehmed Efendi husûs-ı mezbûr için merkūm Karakaş’dan aldığı meblağ-ı mezbûr on bin akçeyi yine müdde‘î-i merkūm Karakaş’a bizim huzûrumuzda def‘ ve teslîm edip ol dahi yedinden ahz u kabz etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince müdde‘î-i merkūm Karakaş bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Mehmed Çavuş b. Ali el-Mübâşir, Mehmed Çelebi b. Abdülmennân Kethüdâ-yı muhzırân, Şükrullah Bey b. Mustafa, Resul b. Rıdvan.