Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 375 Hüküm no: 431 Orijinal metin no: [59b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Yusuf’un, Kerime bt. Mehmed’e sattığı câriye bahasını kefil olan Vildan’dan alması gerektiği Mahmiye-i İstanbul’da Muhtesib Karagöz mahallesinde sâkine bâ‘isetü’l-kitâb Fâtıma bt. Yusuf nâm hâtun meclis-i şer‘-i hatîrde Vildan Hala bt. Abdullah nâm hâtun mahzarında üzerine da‘vâ ve takrîr-i kelâm edip işbu hâzıre bi’l-meclis Kerime bt. Mehmed nâm hâtuna bundan akdem rıkkına mu‘terife orta boylu, açık kaşlı, elâ gözlü Rûsiyyetü’l-asl Gülbûy bt. Abdullah nâm câriye-i memlûkemi yüz otuz esedî guruşa bey‘ ve teslîm ol dahi iştirâ ve tesellüm ve kabûl eyledikden sonra semeni olan meblağ-ı mezbûr yüz otuz esedî guruşa merkūme Vildan mezbûre Kerîme’nin emri ile kefîl oldukdan sonra mukaddemâ otuz esedî guruşunu yedinden ahz u kabz edip hâlâ yüz esedî guruşu dahi kefâletine binâen merkūme Vildan’dan taleb ederim, suâl olunsun dedikde gıbbe’s-suâl mezkûre Vildan vech-i muharrer üzre merkūme Kerime’nin müdde‘iyye-i mezbûreden yüz otuz esedî guruşa iştirâ ve kabz eylediği mevsûfe-i mezkûre Gülbûy’un semeni olan meblağ-ı mezbûra merkūme Kerime’nin emri ile kefîl olduğunu bi tav‘ihâ ikrâr ve i‘tirâf etmeğin mûcebince meblağ-ı bâkī yüz esedî guruşa müdde‘iyye-i mezkûre Fâtıma’ya edâ ve teslîme mezbûre Vildan’a tenbîh olunup mâ vaka‘a bi’t-taleb ketb olundu. Fi’l-yevmi’s-sâlis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: İbrahim Efendi Korucu, Şükrullah b. Mustafa, Mehmed b. Ramazan, Resul b. Rıdvan.