Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 375 Hüküm no: 432 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Efendi b. Osman’ın çocuklarına intikal eden bağın nafaka için vasî tarafından Şaban Beşe b. Eğlence’ye satıldığı Vilâyet-i Anadolu’da Kastamonu sancağında Sart kazâsında Yenice nâm karye sâkinlerinden olup mahmiye-i İstanbul’da Cezerî Kasım Paşa mahallesinde sâkin iken bundan akdem fevt olan Mehmed Efendi b. Osman’ın hasren vârisleri olan sulbiye sagīre kızları Hatice ve Fâtıma’nın tesviye-i umûrlarına kıbel-i şer‘den mansûb vasîleri olan İbrahim Efendi b. Abdünnebi nâm kimesne meclis-i şer‘de işbu bâ‘isü’l-kitâb Şaban Beşe b. Eğlence nâm kimesne mahzarında ikrâr-ı tâm ve takrîr-i kelâm edip müteveffâ-yı mezbûrdan irsle sagīrân-ı mezbûrâna intikāl etmekle sagīrân-ı mezbûrânın mülkleri olup karye-i mezbûre toprağında Abdi Kışlası nâm mevzi‘de vâki‘ bir tarafdan el-Hâc Bayram b. İbrahim mülkü ve bir tarafdan Mustafa b. Muhtar bağı ve bir tarafdan Sunullah b. Maden bağı ve bir tarafdan tarîk-i âm ile mahdûd bir kıt‘a bağı sagīrân-ı mezbûrânın zarûret-i nafakaları için ba‘de’l-müzâyede ve inkıtâ‘i’r-rağbe semen-i misli olan on beş esedî guruşa merkūm Şaban Beşe’ye bey‘ ve kabz-ı semen edip ol dahi iştirâ ve kabûl ettikden sonra mebî‘-i mezbûru mahallinde kabza mezbûr Şaban Beşe’yi taslît eyledim min ba‘d zikr olunan merkūm Şaban Beşe’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-âşir min Recebi’l-mürecceb li sene seb‘a ve seb‘în ve elf. Şuhûdü’l-hâl: Şükrullah Bey b. Mustafa, İbrahim Çelebi b. Mehmed, Abdi Çelebi b. Hüseyin, Halil Efendi b. Ali, Mustafa Efendi b. Abdullah.