Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 376 Hüküm no: 433 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Ahmed’in terekesinden karısı ve çocuklarına kalan paranın vekil aracılığıyla vasîden alınarak vârislere teslim edildiği Mahmiye-i İstanbul’da Sultan Bayezid Hân -aleyhi’r-rahmetü ve’l-gufrân- câmi‘-i şerîfi ve ma‘bed-i latîfi kurbunda Hacı Kara Ali mahallesinde sâkin iken bundan akdem vefât eden okçu el-Hâc Ahmed’in verâseti zevce-i metrûkesi Râbia Hâtun bt. Abdullah ile sulbiye kızı Fâtıma nâm sagīreye ve li ebeveyn ammileri oğulları Durmuş ve Hüseyin ibney Ali ve Hasan b. Şaban’a münhasıra olduğu şer‘an mütehakkik oldukdan sonra sagīre-i mezbûrenin kıbel-i şer‘-i şerîfden mansûb vasîsi olmağla tereke-i müteveffâ-yı mezbûra vâzı‘ü’l-yed olan balcı Osman Bey meclis-i şer‘-i şerîf-i Nebevî ve mahfil-i dîn-i münîf-i Mustafavî’de merkūm Durmuş mahzarında takrîr-i kelâm edip mezbûr Durmuş li ebeveyn karındaşı mezkûr Hüseyin tarafından sâbitü’l-vekâle vekîl olmağla tereke-i müteveffâ-yı mezbûrdan kendi ile karındaşı ve müvekkili mezbûr Hüseyin’e intikāl eden on beşer kıt‘a esedî guruşu cem‘an otuz kıt‘a esedî guruşun tamâmen mezbûr Durmuş’a def‘ ve teslîm edip ol dahi yedimden ahz u kabz eylemişdir suâl olunup ikrârı tahrîr olunmak matlûbumdur dedikde gıbbe’s-suâl merkūm Durmuş cevâbında kaziyye şerh ve beyân olunduğu üzre olup tereke-i müteveffâ-yı mezbûrdan bana ve li ebeveyn karındaşım ve müvekkilim mezbûr Hüseyin’e intikāl eden on beşer esedî guruşu asâleten ve vekâleten vasiyy-i mezbûr Osman Bey yedinden tamâmen alıp kabz eyledim dedikde mâ vaka‘a bi’t-taleb ketb olundu. Fi’l-yevmi’s-sânî min Recebi’l-mürecceb li sene seb‘a ve seb‘în ve elf. Şuhûdü’l-hâl: Balcı Handan b. Abdullah, balcı Mehmed b. Abdullah, balcı Sâlih b. Yusuf, helvacı Abdi [b.] Abdullah.