Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 377 Hüküm no: 434 Orijinal metin no: [60a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed’in, câriye alınması için Halil Beşe’ye para verdiğini iddia ettiği davasını ispat edemediği Mahrûse-i Galata müzâfâtından kasaba-i Kasım Paşa’da ( ) mahallesinde sâkin Mehmed b. ( ) nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Halil Beşe b. İbrahim nâm kimesne mahzarında üzerine da‘vâ ve takrîr-i kelâm edip mezbûr Halil Beşe târih-i kitâbdan bir sene mukaddem abd-i memlûküm hâzır bi’l-meclis Şahin b. Abdullah yedinde olan malımdan bir câriye iştirâ edivereyim deyû on yedi esedî guruş ve on bir guruşa râyic yüz beş semeni ahz u kabz edip meblağ-ı mezbûru kendi mesârifine sarf ile istihlâk etmişdir suâl olunup mezbûr Halil Beşe’den alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr Halil Beşe’ye müdde‘î-i mezbûrun abd-i memlûkü Şahin b. Abdullah yedinden târih-i mezbûrda on yedi esedî guruş ile on bir guruşa râyic yüz yetmiş semen almayıp elân üzerine redd-i zamân lâzım olmadığına mezbûr Halil Beşe’ye yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince mezbûr Mehmed bilâ-beyyine mu‘ârazadan men‘ birle mâ vaka‘a bi’t-taleb ketb olundu. Fi’l-yevmi’l-hâmis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Şükrullah b. Mustafa, Mehmed Ağa Kethüdâ-yı muhzırân, Baba Resul b. Rıdvan, Hasan b. Ahmed.