Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 377 Hüküm no: 435 Orijinal metin no: [60a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen el-Hâc Hüseyin Beşe b. Halil’in terekesiyle ilgili davada vârislerin anlaştıkları Vilâyet-i Anadolu’da Hamid sancağında Ağırnas kazâsına tâbi‘ İslâmköyü nâm karyede vefât eden el-Hâc Hüseyin Beşe b. Halil’in verâseti zevce-i metrûkesi Ümmühâni bt. Durmuş ve sulbiye kebîre kızı Sâkine ve sulbî kebîr oğlu Mustafa’ya münhasıra ve terekesinin dört sehimden üç sehmi mezbûre Ümmühâni’ye ve yedi sehmi mezbûre Sâkine’ye ve on dört sehmi merkūm Mustafa’ya isâbet ettiği şer‘an zâhir ve mütehakkik oldukdan sonra mezbûre Ümmühâni tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mustafa b. Osman ve el-Hâc Osman b. Abdullah nâm kimesneler şehâdetleri ile şer‘an vekâleti sâbite olan Ali Efendi b. Süleyman nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedî’de müteveffâ-yı mezbûrun kızı mezbûre Sâkine tarafından husûs-ı câi’z-zikre vekîl olduğu zâtını ma‘rifet-i şer‘iyye ile ârifân olan Mustafa b. Osman ve el-Hâc Osman b. Abdullah nâm kimesne şehâdetleri ile şer‘an sâbite olan Ömer Bey b. Mustafa nâm kimesne ile oğlu merkūm Mustafa mahzarında ikrâr ve takrîr-i kelâm edip müvekkilem mezbûre Ümmühâni müteveffâ-yı mezbûr zimmetinde cihet-i karz-ı şer‘îden hakkı olan iki bin esedî guruşu mezbûrân Mustafa ve Sâkine muvâcehesinde tereke-i müteveffâ-yı mezbûrdan verin deyû da‘vâ eylediğinde anlar dahi inkâr etmekle ba‘de’n-nizâ‘ muslihûn tavassut edip müvekkilem mezbûre Ümmühâni ile mezbûrân Mustafa ve Sâkine beynlerinde bin esedî guruş üzerine inşâ-i akd-i sulh ettiklerinde müvekkilem mezbûre Ümmühâni dahi sulh-i mezbûru kabûl ettikden sonra mezbûrân Mustafa ve Sâkine tereke-i müteveffâ-yı mezbûrdan olup mahmiye-i İstanbul’da Seydî Bey mahallesinde vâki‘ bir tarafdan Süleyman Ağa mülkü ve bir tarafdan Yusuf Efendi ve Saraylı ( ) Hâtun mülkleri ve bir tarafdan Hacı Mehmed mülkü ve bir tarafdan tarîk-i âm ile mahdûd hâricen ve dâhilen fevkānî ve tahtânî büyût-ı adîde ve ahır ve bahçe ve kenîfi müştemil menzilden yirmi dört sehimden hisse-i şâyi‘aları olan yirmi bir sehmini müvekkilem mezbûre Ümmühâni’ye bin yüz yetmiş beş esedî guruşa bey‘ ve teslîm ol dahi iştirâ ve tesellüm eyledikden sonra mezbûrân Mustafa ve Sâkine semen-i mezbûrun bin esedî guruşu bedel-i sulh-i mezbûra ve yüz yetmiş beş esedî guruşunu müvekkilem mezbûre Ümmühâni’nin müteveffâ-yı mezbûr [60b] zimmetinde sâbit ve mütekarrir olan iki yüz esedî guruşu mehr-i müeccelinden kendi hisselerine düşen yüz yetmiş beş esedî guruşa takās edip müvekkilem mezbûre Ümmühâni dahi mukāssa eylediğinden sonra müdde‘âsı olan meblağ-ı mezbûr iki bin esedî guruşun bedel-i sulhdan bâkīsine ve tereke-i müteveffâ-yı mezbûra müte‘allika âmme-i de‘âvîden mezbûr Mustafa ve Sâkine’yi ve mezbûrân Mustafa ve Sâkine dahi müvekkilem mezbûre Ümmühâni’den tereke-i müteveffâ-yı mezbûrdan dört bin esedî guruş ahz ve ihfâ etmişidi deyû ettikleri da‘vâdan ve esâs-ı beyt ve müteveffâ-yı mezbûrun cemî‘ terekesine müte‘allika âmme-i de‘âvâdan müvekkilem mezbûre Ümmühâni’yi ibrâ-i âmm-ı kātı‘ü’n-nizâ‘la ibrâ ve iskāt eylediler dedikde vekîl-i mezbûr Ali Efendi’nin cârî olan cemî‘ kelimâtını merkūm Ömer Bey vekâleten ve mezbûr Mustafa asâleten tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’s-sâlis aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Mustafa Efendi b. Ali el-Hatîb, Ahmed Beşe b. Ali, Hacı Osman b. Abdullah, Çadırcı Mehmed [b.] Mustafa, Mehmed b. Mehmed, İbrahim b. Ahmed, Abdurrahman Çelebi [b.] Musli.