Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 378 Hüküm no: 436 Orijinal metin no: [60b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Haçador v. Zaharya’nın, vârissiz ölen Abdurrahman Efendi b. Numan’dan esvap bedelinden alacağının terekesinden ödenmesi Mahrûse-i Üsküdar’dan Yeni Mahalle sükkânından bâ‘isü’s-sifr Haçador v. Zaharya nâm zimmî terzi dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i âlîde hâlâ Mahmiye-i İstanbul’da şıkk-ı evvel defterdârı kāimmakāmı olup mahmiye-i mezbûrede Çoban Çavuş mahallesi ahâlîsinden iken ordu-yı hümâyûnda bilâ-vâris fevt olan Abdurrahman Efendi b. Numan’ın terekesini beytülmâl için kabz eden Emîrü’l-ümerâ’i’l-kirâm Mehmed Paşa mahzarında da‘vâ ve takrîr-i kelâm edip müteveffâ-yı mezbûra hayâtında emri ile dikiverdiğim beynimizde ma‘lûm esvâb ücretinden müteveffâ-yı mezbûr zimmetinde altı bin akçe hakkım olup hattâ ikrâr dahi etmişidi, suâl olunup tereke-i vâfiyesinden edâya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda mahmiye-i mezbûreden el-Hâc Ferhad mahallesi sükkânından Hüseyin b. Mehmed ve Mehmed b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr hayâtında müdde‘î-i mezbûra altı bin akçe deyni olduğunu bizim huzûrumuzda ikrâr ve bizi işhâd etmişidi, biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î-i mezbûr tahlîf-i şer‘î ile muhlîf olundukdan sonra mûcebince meblağ-ı mezbûr altı bin akçeyi tereke-i müteveffâ-yı mezbûrdan müdde‘î-i mezbûra edâya mûmâ-ileyh Mehmed Paşa’ya tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min Recebi’l-mürecceb li sene seb‘a ve seb‘în ve elf. Şuhûdü’l-hâl: Umdetü’l-emâcid ve’l-a‘yân defterdâr-ı sânî, fahrü’l-akrân Şaban Ağa Ser-muhzırân, fahrü’l-eşbâh Eyüb Ağa Kethüdâ-yı hazret-i efendi.