Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 379 Hüküm no: 437 Orijinal metin no: [60b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aslan v. Mosi’nin, vârissiz ölen Abdurrahman Efendi b. Numan’dan çuka bedelinden alacağının terekesinden ödenmesi Tâife-i Yahud’un Portakal cemâ‘atinden bâ‘isü’s-sifr Aslan v. Mosi nâm Yahudi dîvân-ı kāimmakām-ı hazret-i sadâret-i uzmâda akd olunan meclis-i şer‘-i âlîde mahmiye-i İstanbul’da şıkk-ı evvel defterdârı kāimmakāmı olup mahmiye-i mezbûrede Çoban Çavuş mahallesi ahâlîsinden iken bundan akdem ordu-yı hümâyûnda bilâ-vâris vefât eden Abdurrahman Efendi b. Numan’ın terekesini beytülmâl için kabz eden Emîrü’l-ümerâ’i’l-kirâm Mehmed Paşa mahzarında da‘vâ ve takrîr-i kelâm edip müteveffâ-yı mezbûr zimmetinde yedimden müşterâ ve makbûz beynimizde ma‘lûm çuka bahâsından on bin akçe hakkım olup hattâ müteveffâ-yı mezbûr hayâtında ikrâr dahi etmişidi suâl olunup tereke-i vâfiyesinden meblağ-ı mezbûru bana edâya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda mahalle-i mezbûre sükkânından Ahmed b. Murtaza ve mahmiye-i mezbûrede Hacı Ferhad mahallesi sükkânından Mehmed b. Abdullah nâm kimesne li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr Abdurrahman Efendi hayâtında müdde‘î-i mezbûra yedinden müşterâ ve makbûz beynlerinde ma‘lûm çuka bahâsından on bin akçe deyni olduğu bizim huzûrumuzda ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle oldukdan sonra müdde‘î-i mezbûr meblağ-ı mezbûru müteveffâ-yı mezbûrdan hayâtında küllen ve ba‘zen ahz ve istîfâ ya hibe ya âhara havâle ya turûk-ı şer‘îden bir tarîk ile zimmetini ibrâ etmediğine yemîn teklîf olundukda ol dahi alâ vefki’l-mes’ûl yemîn billâhi’llezî enzele’t-Tevrâte alâ Musa -aleyhi’s-selâm- etmeğin mûcebince meblağ-ı mezbûru tereke-i müteveffâ-yı mezbûrdan müdde‘î-i mezbûra edâya mûmâ-ileyh Mehmed Paşa’ya tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ aşer min Recebi’l-ferd li sene seb‘a ve seb‘în ve elf. Şuhûdü’l-hâl: Es-Sâbikūn.