Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 493 Hüküm no: 606 Orijinal metin no: [93(2)a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Ahmed Bey’in evini Şehabeddin Efendi’ye satması Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî- mahallâtından Kiremitçi Süleyman Çelebi mahallesi sâkinlerinden Mehmed Çelebi b. Ahmed Bey meclis-i şer‘-i şerîf-i enverde işbu râfi‘ü’l-kitâb Şehabeddin Efendi b. ( ) tarafından ikrâr-ı âti’z-zikri tasdîke vekîl olup bimâ hüve tarîkü’s-sübût şer‘an vekâleti sâbite olan Ahmed Çelebi b. Mehmed mahzarında tav‘an ikrâr-ı tâm ve takrîr-i kelâm edip akd-i âti’z-zikrin sudûruna [değin] silk-i mülk-i sahîhimde münselik olup medîne-i mezbûrede İslâm Bey mahallesinde vâki‘ bir tarafı Mahmud Paşa bahçesi ve bir tarafı Haremeyn-i şerîfeyn halîfesi olan Mehmed Efendi tarlası ve bir tarafı ba‘zan Şaban Bey bağı ve ba‘zan yine mezbûr Mehmed Efendi tarlası ve bir tarafı tarîk-i âm ile mahdûd tûlen ve arzen bi hesâb-ı terbî‘î iki bin dört yüz zirâ‘ arsamı ve bi’r-i mâyı hâvî hazret-i müşârün-ileyh evkāfına senede beş akçe mukāta‘ası olan mülk menzilimi bi cümleti’t-tevâbi‘ ve’l-levâhık müvekkil-i mûmâ-ileyh Şehabeddin Efendi’ye yir[mi] kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ve temlîk edip ol dahi ber vech-i muharrer iştirâ ve tesellüm ve kabûl ve temellük eyledikden sonra semeni olan meblağ-ı mezkûr yirmi guruşu müvekkil-i mûmâ-ileyh Şehabeddin Efendi yedinden tamâmen ahz ve kabz eyledim ba‘de’l-yevm zikr olunan menzil yerinde vechen mine’l-vücûh alâkam kalmadı müvekkil-i müşârün-ileyh keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min şehri Ramazâni’l-mübârek li seneti’l-mezbûr. Şuhûdü’l-hâl: Musa Bey b. Mehmed, Hüseyin Beşe b. Receb, Şâhin b. Mehmed, Halil Çelebi b. Mahmud rûznâmçe, Hüseyin b. Ali, Mehmed b. Eyüb, Mehmed Halîfe Haremeyni’ş-şerîfeyn Baş, Karakaş Mustafa Halîfe Haremeyni’ş-şerîfeyn, Mehmed Çelebi Haremeyni’ş-şerîfeyn.