Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 493 Hüküm no: 607 Orijinal metin no: [93(2)a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Siyavuş oğlu Ahmed ve Mehmed’in ev hisselerini Mustafa b. Mehmed’e istiğlâl yoluylasatması Medîne-i Hazret-i Ebâ Eyyûb Ensârî -radiye anhu Rabbühü’l-Bârî- mahallâtından Kara Süleyman Çelebi mahallesi sâkinelerinden Âişe bt. Osman nâm hâtun meclis-i şer‘-i hatîr-i lâzımü’t-tevkīrde mahalle-i mezkûreden Ahmed ve Mehmed ibney Siyavuş nâm sagīrlerin kıbel-i şer‘den mansûb vasîleri olan işbu râfi‘ü’l-kitâb Mustafa b. Mehmed nâm kimesne mahzarında bi tav‘ihâ ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafı Bedrimâh Hâtun mülkü ve bir tarafı mezkûr Kara Süleyman Çelebi vakfı ve bir tarafı Çavuşbaşı vakfı olan odalar ve bir tarafı tarîk-i âm ile mahdûd bir bâb fevkānî ve bir bâb tahtânî odaları ve sofa ve kenîf ve cüneyneyi müştemil mülk menzilde olan nısf müfrez ve mu‘ayyen hissemi, bi cümleti’t-tevâbi‘ ve’l-levâhık vasî-i mezbûr Mustafa’ya on beş kıt‘a esedî guruşa bi tarîki’l-istiğlâl bey‘ ve teslîm ol dahi sagīrân-ı mezbûrân malıyla tarîk-i merkūm üzre iştirâ ve tesellüm ve kabûl eyleyip semeni olan meblağ-ı mezbûr on beş esedî guruşu vasiyy-i mezbûr Mustafa yedinden tamâmen ahz ve kabz eylediğimden sonra yine vasî-i mezbûr müfrez mu‘ayyen hissem olan menzili ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin iki guruş ve bir rub‘ ücret ile bana îcâr ve teslîm ben dahi ber vech-i muharrer [93(2)b] istîcâr ve tesellüm ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Abdullah Halîfe b. Abdullah el-Müezzin, Ahmed Çelebi b. Abdullah, Abdullah b. Mehmed, İbrahim b. Abdullah, Mehmed b. Eyüb.