Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 494 Hüküm no: 608 Orijinal metin no: [93(2)b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ümmühani Hatun bt. İbrahim Efendi’nin kölesi Subhi bt. Abdullah’ı azat etmesi Mahmiye-i İstanbul mahallâtından Pîr Ömer mahallesi sâkinelerinden fahrü’l-muhadderât Ümmühâni Hâtun bt. el-merhûm İbrahim Efendi tarafından akd-i âti’l-beyânı ikrâra vekîl olup nehc-i şer‘î ve tarîk-i mer‘î üzre şer‘an vekâleti sâbite olan Hüseyin Beşe b. Receb nâm kimesne meclis-i şer‘-i şerîf-i enver ve mahfil-i dîn-i münîf-i ezherde bi’l-vekâle ikrâr-ı tâm ve takrîr-i kelâm edip müvekkilem mûmâ-ileyhâ Ümmühâni Hâtun kendiye rıkkını mu‘terife orta boylu, gök gözlü Rûsiyyetü’l-a[sl] bâ‘isü’l-kitâb Subhi bt. Abdullah nâm câriye-i memlûkesini cemî‘ malından ifrâz edip hasbeten lillâhi’l-ganiyyi’l-hallâk i‘tâk ve tahrîr-i zümre-i harâir-i asliyyâta idrâc ve ilhâk eyleyip min ba‘d câriye-i mevsûfe-i merkūme Subhi sâir harâir-i asliyyât gibi hürre olup üzerinde mevâlî-i utekā için sâbit olan hakk-ı velâdan gayrı hakkım kalmadı dedi dedikde mâ hüve’l-vâki‘ alâ hâze’l-minvâl gıbbe’l-ibtigā ketb olundu. Fi’l-yevmi’l-âşir min şehri Ramazâni’l-mübârek li sene ihdâ ve tis‘în ve elf. Şuhûdü’l-hâl: Osman Bey b. ( ), el-Hâc Osman b. ( ), Abdurrahman Beşe b. ( ), Halil Çelebi b. ( ) ve gayruhüm mine’l-huzzâr.