Eyüb Mahkemesi (Havass-ı Refia) 90 Numaralı Sicil (H. 1090 - 1091 / M. 1679 - 1680) cilt: 31, sayfa: 500 Hüküm no: 616 Orijinal metin no: [94b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Afife bt. Mehmed’in evini İbrahim Ağa b. Abdülmennân’a satması Medîne-i Hazret-i Ebâ Eyyûb el-Ensârî -radiye anhu Rabbühü’l-Bârî- mahallâtından Evlice Baba mahallesi sâkinelerinden Afîfe bt. Mehmed nâm hâtun meclis-i şer‘-i hatîr-i lâzımü’t-tevkīrde işbu râfi‘ü’l-kitâb İbrahim Ağa b. Abdülmennân mahzarında bi tav‘ihâ ikrâr ve i‘tirâf edip akd-i âti’z-zikrin sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafı Saçan Mustafa Çelebi bahçesi ve bir tarafı Hüseyin b. Ebûbekir mülkü ve bir tarafı kasab İsmail veresesi mülkü ve bir tarafı ba‘zan Hüseyin mülkü ve ba‘zan tarîk-i âm ile mahdûd bir bâb tahtânî oda ve bi’r-i mâ ve zât-ı eşcâr-ı müsmire ve gayr-ı müsmire bahçe ve kenîfi müştemil mülk menzilimi cemî‘ tevâbi‘i ve levâhıkı ile mezbûr İbrahim Ağa’ya yüz yirmi kıt‘a esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm ol dahi minvâl-i muharrer üzre iştirâ ve tesellüm ve kabûl ve kabz eyledikden sonra semeni olan meblağ-ı mezbûr yüz yirmi esedî guruşu mezbûr İbrahim Ağa yedinden bi’t-tamâm ve’l-kemâl ahz ve kabz eyledim ba‘de’l-yevm menzil-i mahdûd-ı mezkûrda alâka ve medhalim yokdur mezbûr İbrahim Ağa’nın mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurreti şehri Ramazâni’l-mübârek fi’s-seneti’l-mezbûr. Şuhûdü’l-hâl: Ahmed Ağa b. ( ), Mehmed Efendi b. Ahmed, Musa Beşe b. Abdullah, Mehmed Çelebi b. İbrahim, Mehmed b. Mehmed, Hüseyin b. Mehmed, İbrahim Beşe b. Ahmed, Ahmed b. Mehmed, el-Hâc Ahmed b. Oruc, Yusuf b. Abdullah, Ali b. İslâm.